İtaliyanın Futbol Federasiyası peşəkar liqada bütün oyunları qeyri-müəyyən vaxtadək dayandırıb.
Buna səbəb Kataniya şəhərində keçirilmiş oyun zamanı bir polis nəfərinin ölməsi olub.
Fevralın 7-də İtaliya və Rumıniya yığmaları arasında keçirilməli olan oyun də təxirə salınıb.
İtaliyanın Baş naziri Romano Prodi federasiyanın qərarını dəstəkləyib və idmanda düşmənçiliyə son qoymağa çağırıb.
Fevralın 2-də Siciliyada rəqib «Kataniya» və «Palermo» klubları arasında oyun zamanı tribunalarda hərc-mərclik düşüb.
«Kataniya» azarkeşləri komandaları 0:1 uduzanda, çoxlu fişəng yandırıblar. Hakim oyunu 10 dəqiqəlik dayandırıb. Oyun bərpa olunanda, əvvəlcə «Kataniya» hesabı bərabərləşdirib, lakin sonra «Palermo» irəli çıxıb və oyunu 1:2 hesablı qələbə ilə başa vurub. Bundan sonra hərc-mərclik düşüb və nəticədə bir polis əməkdaşı həlak olub, 100 nəfər isə yaralanıb.
