Qırğızıstanla Qazaxıstan qarşılıqlı mübahisələri Rusiyanın rəhbərlik etdiyi Avrasiya İqtisadi Birliyi (AİB) çərçivəsində həll etməyə razılaşıblar. Bu razılaşma Qırğızıstan prezidenti Sooronbai Jeenbekov-un Qazaxıstanın baş naziri Bakytzhan Sagintaev-lə görüşündə əldə olunub.
Jeenbekov-un mətbuat xidməti dekabrın 26-da bu haqda məlumat yayıb. Məlumata görə, o, Astanaya səfəri zamanı deyib ki, Qazaxıstan qarşılıqlı əməkdaşlığı əngəlləyən məsələlərin həllindən ötrü tədbirlərin görülməsinə diqqət ayırır.
*** Buna da bax: Ondan gözlənilən... 'maraqlar balansının qorunub saxlanmasıdır'
Qırğızıstan prezidenti qazaxıstanlı həmkarı Nursultan Nazarbaev, Sagintaev-lə görüşlər keçirib.
Jeenbekov-un sələfi Almazbek Atambaev Qazaxıstanı Qırğızıstanda 15 oktyabr prezident seçkisinə müdaxilədə ittiham edəndən sonra ikitərəfli münasibətlər gərginləşib. O, həmçinin Nazarbaev-i uzun müddət prezident postunda qaldığına görə tənqid etmişdi.
DEKABRIN ƏVVƏLİNDƏN YUMŞALMA BAŞLANIB
Atambaev Qazaxıstan hakimiyyətini prezidentliyə namizədlərdən Omurbek Babanov-a açıq dəstək verməklə Qırğızıstanın daxili işlərinə müdaxilədə ittiham edirdi. Babanov Atambaev-in dəstəklədiyi namizəd Jeenbekov-un əsas rəqibiydi.
Bu ittihamlar Nazarbaev sentyabrın 19-da Babanov-la görüşəndən sonra səslənib, ancaq Astana onları rədd edib.
Bundan sonra Qazaxıstan qazax-qırğız sərhədində nəzarəti gücləndirib ki, bu da piyadaların və maşınların növbələrinin böyüməsiylə sonuclanıb.
Bişkek durumu bir az da gərginləşdirərək Astanadan 100 milyon dollarlıq yardım paketini qəbul etməyib.
*** Buna da bax: Atambaev Qırğızıstan üçün plan hazırlayır
Atambaev vəzifədən rəsmən dekabrın əvvəlində gedib və Bişkeklə Astananın münasibətlərinin yaxşılaşmasına ümidlər yaranıb.
Noyabrın 30-da Jeenbekov və Nazarbaev Moskvada görüşüblər. Onlar sərhəd probleminin həlliylə bağlı plan hazırlamağa razılaşıblar. Dekabrın 4-dən maşınlar sərhəddən maneəsiz keçməyə başlayıb.
Jeenbekov dekabrın 26-da Moskvaya gedəcək, burada Müstəqil Dövlət Birliyinin dövlət başçılarının qeyri-rəsmi görüşünə qatılacaq.