Keçid linkləri

2017, 24 Noyabr, Cümə, Bakı vaxtı 17:14

Kreditə görə qadına 10 gün həbs verilib


Bu həftə Azərbaycanda bankdan kredit götürən şəxsə zamin duran bir qadının inzibati qaydada həbs edildiyi bildirilir.

Bu haqda hüquqşünas Əkrəm Həsənov danışıb.

Ə.Həsənov deyib ki, Sabunçu Rayon Məhkəməsi «Atabank»dan kredit götürən şəxsə zamin duran Lalə Bunyatovanı həbs edib:

«Onun barəsində 10 gün müddətinə azadlıqdan məhrumetmə qərarı çıxarılıb».

Ə.Həsənov bildirib ki, məhkəmə qərarında qeyd olunur ki, zamin üzrsüz səbəbdən borcu ödəmir:

«Halbuki, o, işdə işsiz kimi təqdim edilir. İşsiz şəxsin borcu ödəməsi mümkünsüzdür və burada vətəndaşın hər hansı təqsirindən söhbət gedə bilməz».

Vəkilin deməsinə görə, L.Bunyatova əslində isə işləyir. Ancaq onun bildirməsinə görə, icra məmuru bunu müəyyən etməyib:

«Əməkhaqqına tutma yönəltmək əvəzinə xanımın həbsi barədə məhkəməyə təqdimat verib. Bu xanım borc üzrə haqqında məhkəmə qərarının olmasını yalnız oktyabrın 4-də, həbsindən 13 gün əvvəl bilib. Buna qədər ona heç bir sənəd göndərilməyib».

Ə.Həsənov deyib ki, borcun məbləği 8 min 701 manatdır. O, məhkəmə qərarından apellyasiya şikayəti verəcəyini söyləyib.

Vəkilin bu açıqlamasına hələlik sözügedən bankın, Sabunçu Rayon Məhkəməsinin və başqa aidiyyəti qurumların münasibətini öyrənmək mümkün olmayıb.

XATIRLATMA

Azərbaycanda «vaxtı keçmiş kreditlər» problemi 2015-ci ildə manatın iki dəfə devalvasiyasından sonra üzə çıxıb. Həmin vaxt manat iki dəfə dəyər itirib.

Hazırda belə kreditlərin həcmi 1 milyard 824 milyon manat təşkil edir.

Kredit borcuna görə həbs edilənlərdən bir neçəsinin şikayətinə hazırda Avropa İnsan Hüquqları Məhkəməsində baxılır.

Günün bütün mövzuları

XS
SM
MD
LG