Rusiyanın ən böyük hava şirkəti Aeroflot öz stüardessalarına məhkəməni uduzdu.
Moskva məhkəməsinin sentyabrın 6-da elan olunan qərarını eşidəndə stüardessalar Evgeniya Magurina və İrina Yerusalimskayanın gözləri doldu.
Qərara görə, hava şirkətinin öz işçilərinin paltar ölçüsünü müəyyən etmək və artıq çəkiyə görə işçinin maaşını kəsmək hüququ yoxdur.
Məhkəmə Aeroflotu məcbur edir ki, stüardessa Magurinanın maaşından tutulan 17 min rublu (295 dollar) geri qaytarsın və işçiyə vurulan mənəvi ziyana görə 5 min rubl (85 dollar) ödəsin.
Stüardessa həmçinin istəyirdi ki, hava şirkətinin hərəkəti diskriminasiya, ayrı-seçkilik kimi qiymətləndirilsin, ancaq məhkəmə buna getmədi.
Yevgeniya Magurina : “Bu bizim üçün böyük qələbədir. Daxili qaydalarda 7.1-ci maddə işçilərlə şirkət arasında ünsiyyətdə əsas maneə idi.”
Məhkəmə stüardessa Yerusalimskayanın da Aeroflota qarşı eyni iddiasını təmin edib.
İrina Yerusalimskaya:“Mən 27 il işləmişəm və yenə stüardessa kimi çalışıram". Paltarın ölçüsünün peşə keyfiyyətlərinə dəxli yoxdur. İnsan əvvəlcə öz işinin peşəkarı olmalıdır, zahiri olanlar ikinci dərəcəlidir. “
Buna da bax: 'Buta Airways' işə düşdü, 'AZALJET' dayandı
Məhkəmədə olan Aeroflot rəsmiləri deyiblər ki, məhkəmənin diskriminasiya iddiasını qəbul etməməsindən razı qalaıblar. Şirkətin qaydaları isə məhkəmə qərarını detallı öyrənəndən sonra dəyişəcək.
Aeroflotun nizamnaməsinə görə stüardessanın paltarının ölçüsü 42 ilə 48 arasında olmalıdır. Şirkət rəhbərliyi bildirirdi ki, stüardessanın artıq çəkisi şirkətə ziyan vurur.
