Suriyada dinc əhaliyə kimyəvi hücum olduğu ehtimal edilir.
Hücum nəticəsində azı 58 adam ölüb. Ölənlərdən 11-i uşaqdır. Bu hadisə ölkənin şimalında, üsyançıların nəzarətində olan İdlib regionunda olub.
İnsan Haqları üzrə Suriya Müşahidə təşkilatının məlumatına görə, aprelin 4-də Xan Şeyxun məntəqəsinə Suriya hökumətinin və ya Rusiya təyyarələrinin zərbələrindən sonra onlarla insanın nəfəs yollarında problemlər yaranıb.
Təşkilatın məlumatına görə, onların bəzilərinin ağzından köpük gəlməyə başlayıb.
Suriyanın Bashar Assad hökuməti kimyəvi silahdan istifadə etməsini inkar edir və öz növbəsində üsyançıları qadağan olunmuş silahdan istifadədə ittiham edir.
Rusiyanın müdafiə nazirliyi isə onların təyyarələrinin Xan Şeyxun ərazisində heç bir hava əməliyyatları aparmadığını deyir.
Fransa höküməti aprelin 4-də hücumla bağlı BMT-nin təcili toplantısını çağırıb. Fransanın xarici işlər naziri bu hadisəni “iyrənc akt” adlandırıb.
Türkiyə mənbələri yazır ki, prezident Rəcəb Tayyib Ərdoğan Rusiya prezidenti Vladimir Putinlə telefon söhbətində bu hadisəni sülh danışıqlarına kölgə sala biləcək "qeyri-insani" hücum kimi qiymətləndirib.
Məlum hücum aprelin 5-də brüsseldə Suriya və regionun gələcəyi haqqında beynəlxalq konfrans ərəfəsində gerçəkləşdirilib.
