-
Nazim Hikmət
Dünyanın ən qəribə məxluqu
Əqrəb kimisən, qardaşım
qorxunc bir qaranlıq içindəsən
əqrəb kimi.
Sərçə kimisən, qardaşım
sərçənin təlaşı içindəsən.
Midyə* kimisən, qardaşım
Midyə kimi qapalı, rahat.
Və sönmüş bir vulkan ağzı kimi qorxuncsan, qardaşım.
Bir deyil,
beş deyil,
milyonlarlasan, nə yazıq.
Qoyun kimisən, qardaşım
bir çodar uşağı qaldırınca zopasını
sürüyə qatılırsan o dəm
və adətən məğrurcasına gedərsən sallaqxanaya.
Dünyanın ən qəribə məxluqusan yəni,
əslən bu dərya içində olub
dəryanı bəyənməyən balıqdan da qəribə.
Və bu dünyada bu zülm
sənin sayəndə.
Və acıq, yorğunuq, al-qan içindəyik əgər
və hələ də şərabımızı çıxartmaq üçün əziliriksə
qəbahət sənin
- deməyə də dilim var gəlmir, amma –
qəbahətin çoxu sənin, canım qardaşım.
Azərbaycan türkcəsinə uyğunlaşdırdı: Azad Qaradərəli