-
Fuad Rəsulzadə
SKARABEY QURDUNA DEDİKLƏRİM
(Tural Qurbanovun timsalında bütün şəhidlərə)
Ən soyuq yerlər qəbiristanlıqlardır
Ən kimsəsiz yerlər də...
Ən yaxın yer də bizə oradı
Haradasa bir güllə uzaqlığında.
Bir atımlıq göz yaşı,
tək buraxılıb getmək
Orda yatanlara da bəlkə ona görə
bu qədər pis təsir eləyir ölmək.
Və sən ey cənazə ora gələn kimi
duyuq düşüb gələn skarabey qurdu!
Sənsən ordakıların ən sadiq dostu,
ətlərini yesən də sümüyünü atmayan!!!
YUBİLEYİMƏ ELEGİYA
Qeyd edirəm yaşımı
Tək-tənha bir qatarda
Otuz il belə keçdi
Arzum harda, mən harda?!
Hər tərəfimi basıb
Qaranlıq, ümidsizlik.
Kökdən düşmüş alətəm
Hardasa 30 illik.
Bədənim də özümə
İstəyir etsin qiyam,
Ona da macal vermir
Məhv olmuş ambissiyam.
Baxıb inanmıram da
Özümə, taleyimə.
Gəlib qatardakılar
Bəlkə də yubileyimə.
Yox, onlar gəlmir, gedir
Tələsirlər harasa.
Bilirəm darıxmırsan
Heç olmasa yada sal.
KASIBLIĞIN FƏLSƏFƏSİ
Kaş ki,
daha daşı qaldırmaya,
gəlmək üçün tanrıların xoşuna.
Xoşbəxtlik üçün etdiyimiz
bütün cəhdlərimizin
Sizifin daş qaldırmağı qədər
boşuna olduğunu
hamı düşünə.
Xəyallar, coğrafiya kitablarında
qiyabi səyahətlə başlayıb
metro kartını 2 manata satmaqla qurtarır,
ən çılğın ehtiraslardan geriyə
qalsa-qalsa ancaq uşaq qalır.
Böyüklər həmişə deyirdi
əsas pul deyil, sağlıqdı.
Alimlərin araşdırmasına görə
ən sağalmaz irsi xəstəlik
kasıblıqdı.
Ən yaxşı saçlar
oğul meyidinin üstündə
yolunur.
Bir otaqlı kirayə evlər, ilahi!
Necə bir dünya ümidə
peredelka olunur?!
