«Beynəlxalq Şəffaflıq» («Transparency International») Təşkilatı noyabrın 6-da 163 ölkə üzrə «Korrupsiyanın Qavrama İndeksi»ni açıqladı. İki il bundan əvvəlki dövrü əhatə edən hesabatda Azərbaycan korrupsiyanın səviyyəsinə görə, 163 ölkə arasında 2,4 balla 130-cudur. Korrupsiyanın ən az olduğu ölkə 9,6 balla Finlandiya, ən çox olduğu ölkə isə 1,8 balla Haitidir. Sənəddə Gürcüstan 99-cu, Ermənistan isə 93-ci yerləri tutur. Ötən illərlə müqayisədə Gürcüstanda korrupsiyanın səviyyəsinin aşağı düşdüyü, Ermənistanda isə bir qədər çoxaldığı bildirilir.
Ötən hesabat dövrü ilə müqayisədə Azərbaycanda korrupsiyaya qarşı mübarizədə hansı işlər görülüb? Hökumət son hesabatda ölkənin qərarlaşdığı yerlə razıdırmı? «Şəffaflıq Azərbaycan» Təşkilatının icraçı direktoru Rəna Səfərəliyeva və Dövlət Qulluğunu İdarəetmə Şurası Yanında Korrupsiyaya Qarşı Mübarizə üzrə Komissiyanın katibi İnam Kərimov mövzunu müzakirə edir.