-
Qırğızıstan prezidenti Almazbek Atambaev rusiyalı həmkarı Vladimir Putinlə görüşmək üçün Sankt Peterburqa gəlib.
Atambaev martın 16-da Putinlə danışıqlar aparacaq. Tərəflərin Qırğızıstan-Rusiya əməkdaşlığı, birgə biznes layihələri, Qırğızıstanın Avrasiya İqtisadi Birliyinə üzvlüyü məsələlərini müzakirə edəcəyi gözlənir.
Qırğızıstanın baş naziri Joomart Otorbaev ötən həftə deyib ki, ölkəsi mayın 9-dək Moskvanın rəhbərlik etdiyi birliyin tam üzvü olmalıdır.
Bu arada Rusiya prezidentinin xəstələnməsi barədə şayiələr yayılıb. O, martın 5-dən ictimaiyyət arasında görünməyib, görüşlərini təxirə salıb.
Rusiya rəsmiləri onun səhhətinin qaydasında olduğunu dəfələrlə bildirib, ancaq uzun müddət görünməməsini şərh etməyib.