-
Parlamentin martın 6-da keçirilən iclasında Cinayət Məcəlləsinə dövlət sirrinin açıqlanmasına görə məsuliyyəti sərtləşdirən düzəlişin edilməsi məsələsi müzakirə olunub.
Qanun layihəsinə görə, bundan sonra şəxsin dövlət sirrini yaymasına görə 3 ildən 6 ilədək müddətə müəyyən azadlıqdan məhrumetmə cəzası veriləcək. Öncə bu müddət 2 ildən 5-ilədək idi. Ancaq dövlətə xəyanət əlamətləri varsa, bu zaman mühakimə başqa maddəylə aparılır.
Eyni əməllər ağır nəticələrə səbəb olduqda 4 ildən 8 ilədək müddətə azadlıqdan məhrumetmə (284.2-ci maddə) ilə cəzalandırılacaq. Bundan öncə bu maddə 3 ildən 7 ilədək azadlıqdan məhrumetməni nəzərdə tuturdu.
Milli Məclisin Hüquq siyasəti və dövlət quruculuğu Komitəsinin sədri Əli Hüseynli bildirib ki, məqsəd sözügedən qanunu təkmilləşdirməkdir:
«Təklif olunan dəyişikliklər dövlət sirri haqqında qanunvericiliyi təkmilləşdirməyə imkan verir. Hesab edirəm ki, müstəqilliyimizin bu məqamında dövlət sirrini yaymağa görə sanksiyaların sərtləşdirilməsi məqsədə müvafiqdir».
Cinayət Məcəlləsinə dəyişikliklər qəbul edilib.