Oktyabrın 14-də prezident İlham Əliyev «Regionların inkişaf proqramı» çərçivəsində həyata keçirilən işləri yerində yoxlamaq məqsədilə Şəki rayonunda olub. Prezidentin mətbuat xidmətindən «Azadlıq» radiosuna bildiriblər ki, səfər zamanı dövlət başcısı mobil elektrik stansiyasının və «Şəki Saray» otelinin açılış mərasimlərində iştirak edib, rayon əhalisi ilə görüşüb.
Günün ikinci yarısı İlham Əliyev Bakıya qayıdıb.
Prezident Aparatından verilən başqa bir məlumata görə isə, İlham Əliyev oktyabrın 17-də Belarusa ikigünlük səfərə gedəcək. Səfər çərçivəsində bir sıra sahələrdə ikitərəfli müqavilələrin imzalanacağı gözlənilir. Səfər oktyabrın 18-də başa çatacaq.