«Şərq» qəzeti yazır ki, parlamentin payız sessiyasının ilk iclaslarında millət vəkilləri tərəfindən ayrı-ayrı qanun layihələrinin qəbulunun vacibliyi ilə bağlı fikirlər səsləndirilsə də, ictimaiyyətin qəbul olunmasını çoxdan gözlədiyi «Təhsil haqqında» qanundan söz açan yoxdur. «Təhsil haqqında» qanuna millət vəkillərinin göstərdiyi münasibət onu deməyə əsas verir ki, bu qanunun qəbulu payız sessiyasında da mümkün olmayacaq. Tələbə Qəbulu üzrə Dövlət Komissiyasının sabiq sədri Vurğun Əyyub hesab edir ki, qanunun qəbulunun ləngiməsinin səbəbi layihənin hazır olmamasıdır. «Şərq»in əməkdaşı ilə söhbətində AVP-dən olan millət vəkili Zahid Oruc isə deyib ki, belə bir qanunun qəbul olunması layihə şəklində irəli sürülüb. «Biz onu yazılı olaraq planın şərtində təsbit etmişiksə, əlavə kimsə tərəfindən bunun dilə gətirilməsi artıq olardı», - deyən millət vəkili vurğulayıb ki, bu sessiya müddətində bir sıra qanunların qəbulu baş tutacaq, eləcə də «Təhsil haqqında» qanunun.
«Bakı-Xəbər» qəzeti yazır ki, Kəmaləddin Heydərovun guya ölkəni birdəfəlik tərk etməsi, əmlakının əlindən alınması və s. bu kimi özünü doğrultmayan informasiyalar yayıldıqdan sonra, oktyabrın 10-da Fövqəladə Hallar naziri Daxili İşlər nazirilə birlikdə eyni tədbirdə iştirak etdi. Təxminən elə həmin tədbirlə eyni vaxtda keçirilən Milli Məclisin iclasında cənab Heydərovun adamı kimi qələmə verilən millət vəkili Hüseyn Abdullayev isə Daxili İşlər nazirinin ünvanına sərt ittihamlar səsləndirərək, onu «cinayətkar» adlandırdı. Müəllifə görə, məsələnin digər maraqlı tərəfi H.Abdullayevin Ramil Usubovun Hacı Məmmədovun dəstəsinə başçılıq etməsinə dair dediklərini əsaslandırmasıdır: «Faktları spikerin stolunun üstünə qoymuşam». Söhbətin hansı faktlardan getdiyi isə hələ də məlum deyil. Müəllif yazır ki, H.Abdullayev «spikerin stolunun üstünə qoyduğu» faktları mətbuata və cəmiyyətə də açıqlasa, bu mənzərə daha aydın olar. Əlbəttə ki, əgər belə faktlar varsa...
«Yeni Azərbaycan» qəzetindəki «Sahibkarlara 74 milyon manat kredit verilib» başlıqlı məqalədə bildirilir ki, Sahibkarlığa Kömək Milli Fondu dövlət büdcəsindən ayrılmış vəsaitlərin təxminən 92 faizini artıq sahibkarlara paylayıb. Fonddan verilən məlumata görə, kreditlərin paylanılması 57 şəhər və rayon üzrə həyata keçirilib. Qurumda hesab edirlər ki, kreditlər sənaye məhsullarının istehsalı, kənd təsərrüfatı mallarının istehsalı və emalı, fermer təsərrüfatlarının, turizm obyektlərinin infrastrukturunun yenidən qurulması və yaradılması, eləcə də xidmət sahələrinin inkişaf etdirilməsi üçün nəzərdə tutulub. Bundan başqa, 2006-cı ildə sahibkarlıq subyektlərinə verilmiş kreditlər hesabına həyata keçirilən layihələr nəticəsində 14 min 500-dək yeni iş yeri yaradılacaq.
«Üç nöqtə» qəzetindəki «Tələbələr çıxış yolunu vətəndaşlıqdan imtinada görür» başlıqlı məqalədə bildirilir ki, Təhsil Nazirliyinin kollegiya iclasının qərarından sonra fəaliyyətinə xitam verilən Müstəqil Azərbaycan Universiteti ilə bağlı problemlər daha da artmaqdadır. Artıq universitetin 2-ci kurs tələbələri ilə yanaşı, digər universitetlərə köçürülən tələbələr də təhsil hüquqlarının bərpa edilməsini istəyirlər. Oktyabrın 19-da Binəqədi Rayon Məhkəməsində şikayətlərinə baxılacağını deyən tələbələr, məhkəmənin hansısa müsbət qərar çıxaracağına inanmırlar. Narazı tələbələr bildiriblər ki, bir həftə ərzində onların hüquqları bərpa olunmayacağı təqdirdə, Azərbaycan vətəndaşlığından imtina edəcəklər.