«Yeni Müsavat» qəzetindəki «Hakimiyyət Fərhad Əliyevdən əl çəkmir» başlıqlı məqalədə müəllif adını açıqlamadığı mənbəyə istinadən İqtisadi İnkişaf Nazirliyi Sahibkarlıq Derartamentinin sabiq rəisi Əlihüseyn Şalıyevin intihar etmədiyini, onun döyülərək öldürüldüyünü yazır. Mənbədən verilən məlumata görə, cənab Şalıyevin qarşısında saxta ifadə vermək tələbi qoyulub və müstəntiqlər buna nail olmadıqda ona ağır işgəncələr veriblər. Mənbənin sözlərinə görə, sabiq idarə rəisindən keçmiş İqtisadi İnkişaf naziri Fərhad Əliyevin üzünə durmaq tələb olunurmuş. Belə ki, istintaqçılar Ə.Şalıyevi F.Əliyevdən pul alaraq mərhum jurnalist Elmar Hüseynovu qətlə yetirmək üçün Hacı Məmmədova verdiyini «etiraf etməyə» razı salmaq istəyirmiş.
«Xalq Cəbhəsi» qəzetindəki «Neft Fondunun Müşahidə Şurasının tərkibi genişləndirilməlidir» başlıqlı məqalədə bildirilir ki, hökumət neft gəlirlərindən istifadə üzrə Beynəlxalq Şəffaflıq Təşəbbüsünə qoşulsa və Neft Fondunun Müşahidə Şurası yaradılsa da, bu sahəyə ölkə daxilində ictimai nəzarətin təmin olunduğunu demək olmaz. Ən azından ona görə ki, Neft Fondunun Müşahidə Şurasının tərkibi ayrı-ayrı hökumət qurumlarının rəhbərlərindən ibarətdir. Müəllifin fikrincə, əgər fondun fəaliyyəti şəffafdırsa, onun idarəolunmasında ictimaiyyətin nümayəndələri də iştirak etməlidir. Belə ki, fondun Müşahidə Şurası tərkibinə QHT-lərin, mətbuatın, hətta müxalifəti təmsil edən partiyaların nümayəndələri də daxil edilməlidir.
«Gündəlik Azərbaycan» qəzetindəki «Müxalifətin payız taktikası» başlıqlı məqalə hazırda Azərbaycanda hökm sürən siyasi durğunluq barədədir. Müəllifə görə, Azərbaycanda siyasi durğunluğa təkcə hakimiyyətin seçkilərin nəticələrini saxtalaşdırması deyil, həm də seçkisonrası repressiyalar, təqib və təzyiqlər ciddi təsir göstərir. Amma müəllifin fikrincə, əgər müxalifət hakimiyyətə gəlməyə iddialıdırsa, növbəti seçki ilini gözləməməli, həm öz arasında inteqrasiya prosesinə, həm də cəmiyyətin fəallaşmasına indidən başlamalıdır.
«Şərq» qəzetindəki «Məmurlar ana dilini öyrənir» başlıqlı məqalədə müəllif yazır ki, hazırda bir çox yüksək vəzifəli məmurlar və bəzi nazirlərin tələffüzündə rus dili elementlərinin özünü göstərməsi adi hala çevrilib. Hətta iş o yerə çatıb ki, onlar Azərbaycan sözünü də düzgün tələffüz edə bilmirlər. Rəyçilər də hazırda yüksək vəzifəli şəxslərin ana dili problemi olduğunu etiraf edirlər. Azərbaycan Atatürk Mərkəzinin rəhbəri, professor Nizami Cəfərov bunun əsas səbəbini mərkəzi təşkilatlar və bütün məmur sisteminin əsasən rusdilli mühitdən çıxması ilə əlaqələndirir. Cənab Cəfərov bu kimi problemlərin çözülməsi üçün Azərbaycan dilçilərinin qurultayının keçirilməsini zəruri sayır.