ABŞ Dövlət Katibi John Kerry deyir ki, Vyanada iranlı həmkarı Mohammad Javad Zarif ilə İranın nüvə proqramına dair apardığı danışıqlar «çox ağır» keçir. Kerry bunu iyulun 14-də deyib. İranın ziddiyyətli nüvə proqramını məhdudlaşdıracaq sazişin əldə olunması üçün qoyulan son tarix iyulun 20-də bitir.
ABŞ rəsmisi Vyanada «Radio Farda»ya demişdi ki, Kerry danışıqlarda irəliləyişin əldə olunmasının mümkünlüyünə baxacaq. Ancaq məlumatlara görə, Kerry iyulun 15-də Misirə uçacaq, Qəzza zolağında atəşkəsin əldə olunması imkanlarını araşdıracaq.
Britaniya, Fransa və Almaniya xarici işlər nazirləri iyulun 13-də Vyananı tərk ediblər. Onlar İrandan güzəşt qoparmaq üçün səy göstəriblər. Rusiya və Çin danışıqlara aşağı səviyyəli rəsmi göndərib.