-
Bakı Apellyasiya Məhkəməsi həbsdə olan vəkil Qurban Məmmədovun şikayətinə baxıb.
Bu haqda AzadlıqRadiosuna məlumat verən vəkil Xalid Bağırovun dediyinə görə, iyunun 8-də keçirilən prosesdə ilkin instansiya məhkəməsinin Qurban Məmmədov haqqında çıxardığı 3 il azadlıqdan məhrumetmə cəzası qüvvədə saxlanılıb.
Qurban Məmmədov ötən il iyunun 4-də həbs edilib. O, Cinayət Məcəlləsinin 263.1 (yol hərəkəti və nəqliyyat vasitələrinin istismarı qaydalarını pozma) maddəsi ilə ittiham olunur. Ötən ilin dekabrında Nəsimi rayon Məhkəməsi onun haqqında 3 illik həbs cəzası çıxarıb.
Müdafiə tərəfi onun həbsinin siyasi sifarişli olduğunu bildirir.
Qurban Məmmədov milli-azadlıq hərəkatının fəallarındandır. Uzun illər vəkilliklə məşğul olub, siyasi fəaliyyət göstərib, bir neçə dəfə həbsdə yatıb.