-
Qazax Dövlət Dram Teatrında Əli Əmirlinin «Kişi və Qadın» komediyasına ictimai baxış olub.
Teatrdan verilən xəbərə görə, bir aylıq intensiv məşqlər müsbət bəhrəsini verib. Rayon ziyalılarının iştirakı ilə baş tutan sınaq tamaşası böyük hərarətlə qarşılanıb. Tamaşanın müzakirəsində dramaturji material, peşəkar rejissor işi və istedadlı aktyor oyunu yüksək qiymətləndirilib.
Bütün zamanlar üçün aktual olan kişi və qadın münasibətləri, məhəbbət, sədaqət, etibar, habelə xəyanətdən bəhs edən bu əsərə Qazax teatrında Xalq Artisti Zülfüqar Abbasov çox maraqlı və orijinal quruluş verib.
Tamaşanın rəssamı Səyyad Məmmədovdur.
Rolları teatrın direktoru Saqif İskəndərov, Zəmanə Orucova, Xanım Məmmədova, Hacı Hacıyev və Nazilə Məmmədova ifa ediblər.
Əli Əmirlinin «Kişi və Qadın» komediyası ilk dəfə dünyadan vaxtsız köçmüş görkəmli rejissor Hüseynağa Atakişiyev Dövlət Gənclər Teatrında tamaşaya qoyub.
Sonralar Gəncə, Qusar, Mingəçevir teatrları da bu əsərə müraciət ediblər.
