Keçid linkləri

2024, 29 Mart, Cümə, Bakı vaxtı 13:08

Sayman Aruz. Məsnəvilər
















Gözlərimdən kədərli insan keçir
Ürəyimdən nəmişli zindan keçir

Dodağımda ədəbli bir söyüş var
Yumruğumda məhəbbətli döyüş var

Qucağımda ümidsizlər yatırlar
Sonra durub qucağımı satırlar

Unudurlar suçlarını örtməyə
Dəsmalımla saçlarını örtməyə

Danışanda danışırlar VƏTƏNdən
Alışanda alışırlar BƏDƏNdən

Sözlərimin serçəsinə daş atan
Gözlərimin gözlərini yaşladan

Gözyaşımla əllərinin qanını
Baş daşımla ağacdakı qarğanı

Külüng olan, qələmləri sındıran
Azadlığı üstümüzə fınxıran

Yarı qarqa, yarı bayquş, adamlar
Yarı darda, yarı evdə qalanlar

Öz dostunun arvadını qandıran
Sonra dönüb dostuna can yandıran

Biz ağrılar meyvəsiyik və bunlar
Oynayırlar kəməraltı oyunlar

Güzqüləri xoşlamayan dostlarım
Tutduqların boşlamayan dostlarım

Güzgü özün görə bilməz, neyləsin
Kor götürüb gedə bilməz kölgəsin!

Biz quyruqsuz, biz qanadsız quşlarıq
Çatmağı yox, getməyi biz xoşlarıq

Siz oturun qucaqlayın dizləri
Yağış yağar çıxardar ilbizləri!


***


Vətənin üstündə vətən tikirlər
Bədənin üstündə bədən tikirlər

Deyirlər camaat, qloballaşın
Buraxın vətənin toprağın, daşın

And ola baharsız yağan yağışa
Vətən bahar deyil çevrilə qışa

Vətən topraq deyil, vətən daş deyil
Vətən səni satan vətəndaş deyil

Ruh kimi dolanır bütün canımda
Qırmızı inamdır damarlarımda

Vətən adam deyil deyəsən azma
Millətin cəhlini vətənə yazma

Şərəfsiz insana vətən nə lazım
Şərəfsiz insana bədən nə lazım

Vətən millətçinin batan səsidir
Hələ duyulmamış düşüncəsidir

Vətən çəkilməmiş sınırlar kimi
Hələ keçilməmiş cığırlar kimi

Gözümdə məsnəvi baxışlarımdır
Fəlsəfi danışan baxışlarımdır

Vətən sürgün demək, yalqızlıq demək
Vətən öz tökdüyün yaşları yemək

Dünyada hər bir şey gəlib gedəndir
Vətən dəyişməzdir, vətən vətəndir.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG