“Şərq” qəzetinin əməkdaşı Daxili İşlər Nazirliyi Baş Cinayət-Axtarış İdarəsinin sabiq baş əməliyyat müvəkkili Hacı Məmmədov və onun rəhbərlik etdiyi dəstənin məhkəmə prosesi barədə ekspertlərin fikirlərini öyrənib. Belə ki, Demokratiya və İnsan Haqları Komitəsinin sədri Çingiz Qənizadə bu məhkəmə prosesinin uzun çəkəcəyi və şok açıqlamalarla müşayiət olunacağı fikrindədir. Sabiq millət vəkili, müstəqil politoloq Cümşüd Nuriyev isə, bu fikirdədir ki, heç cür ola bilməzdi ki, dövlətin hüquq-mühafizə orqanının yüksək vəzifəli işçiləri ölkə daxilində adam qaçırmaqla, adam oğurlamaqla, öldürməklə məşğul olsun. Bu, beynəlxalq cinayətkar dəstədir və orada başqa dövlətlərin də vətəndaşları iştirak edib.
“Xalq Cəbhəsi” qəzetinin əməkdaşı Azərbaycan Silahlı Qüvvələrinin NATO standartlarına uyğunlaşdırılması, bu prosesin müsbət və mənfi tərəfləri barədə cəmiyyətdəki müxtəlif mövqeləri şərh edib. Müdafiə Nazirliyinin Mətbuat Xidmətinin əməkdaşı İlqar Verdiyev bildirib ki, Azərbaycanın hərbi təhsil sistemi hələ 1997-ci ildən NATO standartlarına keçib və hərbi hissələr də bu sistemə uyğunlaşdırılır. Cənab Verdiyev yeni sistemə keçidlə bağlı Silahlı Qüvvələrin kadr problemilə üzləşməyəcəyini də deyib. Hərbi ekspert Üzeyir Cəfərovun fikrincə isə, Azərbaycan ordusunun NATO standartlarına keçidi çox ləng getdiyindən Türkiyədə təhsilini başa vurub gələn gənc kadrlar sistem uyğunsuzluğunun qurbanı olur.
“Yeni Müsavat” qəzetindəki “Mətyu Brayza yenə danışdı” başlıqlı məqalədə bildirilir ki, Ermənistanın “Aykakan Jamanax” qəzetinə müsahibə verən ABŞ Dövlət katibinin köməkçisi deyib ki, Dağlıq Qarabağ münaqişəsinə dair danışıqlar prosesinin detallarını açıqladığına görə, hər iki tərəfdən ona yönələn iradları başa düşmür. “Danışıqlar prosesinin prinsiplərini açıqlamaq qərarını mən yox, üç həmsədr hələ Minsk Qrupuna həmsədr təyin edilməyimdən əvvəl qəbul ediblər”, - deyə cənab Brayza bildirib.