«Şərq» qəzetindəki «Referendum müəmması» başlıqlı məqalədə bildirilir ki, açıqlanan «çərçivə sazişi»ndə Dağlıq Qarabağın statusu ilə bağlı referendumun keçirilməsinin nəzərdə tutulması Azərbaycan cəmiyyətində müəyyən narazılıqlar yaradıb. Politoloq Hikmət Hacızadə hesab edir ki, müzakirə olunan sənədin hansı variant olmasından asılı olmayaraq, oraya referendum məsələsinin salınması Azərbaycan tərəfindən qəbul edilməzdir. «Bu, o deməkdir ki, referendumu ermənilər keçirəcəklər və onlar özlərinə istədikləri statusu verəcəklər. Ona görə də mən bu məsələyə Qarabağın itirilməsi kimi yanaşıram»- deyən politoloq bildirib ki, Azərbaycan üçün bu addımın atılması inandırıcı görünmür. Referendumla bağlı məsələnin gündəmə gətirilməsi ilə qəti şəkildə razılaşmayan politoloq Rasim Musabəyov isə hesab edir ki, ortalığa atılan sənəd üzrə razılaşma əldə olunmayacaq.
«Gün Səhər» qəzetindəki «Pullu təhsil bahalaşdı» başlıqlı məqalədə bildirilir ki, hüquq, beynəlxalq hüquq, tibb və tibbi biologiya fakültələrinə tələbə qəbulu dayandırılan özəl universitetlər bunun əvəzini təhsil haqqını qaldırmaqla çıxmaq istəyirlər. Artıq «Azərbaycan», «Odlar Yurdu», «Təfəkkür» və digər universitetlərdə təhsil haqqının qaldırılması barədə rəsmi açıqlama verilib. Təhsil Nazirliyi isə özəl universitetlərdə təhsil haqlarının qaldırılmasını ciddi qanun pozuntusu kimi dəyərləndirir. Nazirlikdə hesab edirlər ki, özəl universitetlər özbaşına belə bir qərar verə bilməz. Çünki bütün xidmət sahələrində olduğu kimi, özəl universitetlərdə də təhsil haqqını İqtisadi İnkişaf Nazirliyinin nəzdində fəaliyyət göstərən Tarif Şurası müəyyənləşdirir. Buna görə də Təhsil Nazirliyi məsələnin həlli üçün İqtisadi İnkişaf Nazirliyinə müraciət edib.