İctimai Palata cərimələrin artırılmasına etiraz edir

AKSİYADA SAXLANANLARIN HAMISI SƏRBƏST BURAXILIB

İctimai Palatanın 2 noyabr piketi ilə bağlı Yasamal rayon polisinə aparılan 11 nəfərin hamısı xəbərdarlıq edildikdən sonra sərbəst buraxılıb. Bu barədə AzadlıqRadiosuna AXCP sədrinin müavini Həsən Kərimov məlumat verib.

«Aksiya zamanı saxlanan 17 nəfərin hamısı Yasamal polisində idi. Onlardan 6 nəfəri AXCP, 5 nəfəri Müsavat partiyasının üzvləri idi. Onların hüquqlarının müdafiəsinə 2 vəkil qoşulmuşdu. Sadəcə polisdən dedilər ki, onlar buraxılacaq deyə vəkilə ehtiyac yoxdur».

Noyabrın 2-də İctimai Palata üzvləri Milli Məclisdə müzakirəyə çıxarılan «Sərbəst toplaşma azadlığı haqqında» qanunla, «İnzibati və Cinayət məcəllələrinə» təklif edilən dəyişikliyə etiraz ediblər.

Təklif edilən həmin əlavə və dəyişikliklərdə icra hakimiyyəti ilə razılaşdırılmamış aksiyaya görə cərimələrin dəfələrlə artırılması istənilir.

AKSİYA İŞTİRAKÇILARI AVTOBUSLARA MİNDİRİLİR

Hazırda polislər və mülki geyimli şəxslər aksiyaçıları həmin ərazidən keçən sərnişin avtobuslarına zorla mindirərək yola salırlar.

AzadlıqRadiosunun İctimai Palatanın piketindən CANLI yayımı

 JURNALİSTLƏRİ DƏ ƏRAZİDƏN UZAQLAŞDIRMAĞA ÇALIŞIRLAR
 
Parlamentin qarşısında bir neçə aksiyaçı «İstefa», «Saxta parlament buraxılsın» şüarları səsləndirilib.
 
Bir neçə aksiya iştirakçısı mülki geyimli şəxslər tərəfindən zorla sərnişin avtobusuna mindirilib. Polislər və mülki geyimli şəxslər jurnalistləri də ərazidən uzaqlaşdırmağa çalışırlar.

10 nəfərə yaxın aksiyaçı saat 12 radələrində 20 saylı məktəbin qarşısından Milli Məclis istiqamətində getmək istəyib. Polislər imkan verməyib. AzadlıqRadiosunun müxbiri xəbər verir ki, 6-7 nəfər polis maşınına mindirilərək ərazidən naməlum istiqamətdə aparılıb.