-
Oktyabrın 27-də Naxçıvan Şəhər Məhkəməsində Fərid Əsgərovun jurnalist İlqar Nəsibova qarşı iddiası ilə bağlı hazırlıq iclası keçirilib.
Bu haqda AzadlıqRadiosuna İlqar Nəsibovun həyat yoldaşı, hüquq müdafiəçisi Məlahət Nəsibova məlumat verib:
«Məhkəməyə Naxçıvan Vəkillər Kollegiyasının üzvləri də gəlmişdi. Prosedur qaydalarına görə, hakim İlqara həmin vəkillərin xidmətindən istifadə etməyi təklif etdi. İlqar da bu vəkillərin xidmətindən imtina etdi».
Növbəti məhkəmə prosesi noyabrın 5-ə təyin olunub.
İlqar Nəsibov avqustun 21-də Naxçıvanda Demokratiyaya Dəstək Resurs Mərkəzinin ofisində bir neçə şəxs tərəfindən döyülüb. Onun qabırğaları, burnu, almacıq sümükləri qırılıb, çoxsaylı xəsarətlər yetirilib. Həkimlər jurnalistin üzünə 10-a yaxın tikiş qoyub və güclü beyin silkələnməsi olduğunu qeydə alıb. Hadisədə əli olanlardan biri - Fərid Əsgərova Cinayət Məcəlləsinin 127.1-ci maddəsi ilə cinayət işi açılmışdı. Daha sonra Fərid Əsgərov eyni ittihamla İlqar Nəsibovdan şikayətçi olmuşdu.
Oktyabrın 24-də Naxçıvan Şəhər Məhkəməsində İlqar Nəsibovun Fərid Əsgərova qarşı iddiası ilə bağlı hazırlıq iclası keçirilmişdi. Bu iddia ilə bağlı məhkəmə prosesi noyabrın 4-də keçiriləcək.