-
Mayın 13-ü saat 10 radələrində Astara rayonunun Çayoba kəndində baş vermiş qəza ilə bağlı hadisə yerindən qaçdığı deyilən sürücü Vüsal Xudaverdiyev tutulub.
Xəbəri Daxili İşlər Nazirliyi yayıb.
Mayın 13-də Xaçmaz rayon sakini Vüsal Xudaverdiyevin idarə etdiyi «KamAZ» Astara rayon sakini Qalib Əliyevin «Mercedes-Benz» markalı mikroavtobusu ilə toqquşub. Hər iki avtomobil aşıb, V.Xudaverdiyevin hadisə yerindən qaçdığı deyilirdi.
Yol qəzası nəticəsində Q.Əliyevin sərnişinlərindən rayon sakinləri Yeganə Əliyeva və Ramil Quliyev hadisə yerində ölmüşdü. Daha 9 sərnişin xəstəxanaya yerləşdirilmişdi. Onlar ilkin tibbi yardım göstərildikdən sonra buraxılıblar.
Astara Rayon Polis Şöbəsi əməkdaşlarının həyata keçirdikləri əməliyyat-axtarış tədbirləri nəticəsində V.Xudaverdiyevin tutulduğu bildirilir.
V.Xudaverdiyevin ona qarşı iddialara nə cavab verdiyi, hələlik, bəlli deyil.