Keçid linkləri

2024, 29 Mart, Cümə, Bakı vaxtı 05:27

Atalar ən ucuz oyuncaq axtarışında


Tural İsmayılov
Tural İsmayılov

- Tural İsmayılov

Hardasan?

Adını duyduğum gündən

Səninlə idi beynim.

Suallar beynimdən ruhuma yayıldıqca,

Və gecələr günüzlərdən daha sakit olanda sual verirdim -

Hardasan?

Qonşumuzda uşaqlar itkin düşəndə,

Evlərindəki ah-naləyə qonşular şəbədə qoşanda,

Uşaqlığımın bir tikə pendir çörəyini

Qonşunun oğlu ilə bölüşəndə, sual verdim -

Hardasan?

Sonra mən dərk etdim ki,

Pis adamlar gəbərmir.

Yaxşı adamlardır həyatın ən əclaf sındırılmışları.

Xeyirxah nənələr öləndə nəvələr sual edərdi -

Hardasan?

Orta məktəbdə yaxşı oxuduqlarımıza da

Bir mız qoyanda bizim müəllimlər,

Atası varlı, iç dünyası kasıb uşaqlar

Müəllimləri qarşısında az qala təzim etdirəndə deyirdim -

Hardasan...?

Əclaf adamlar şişərkən,

Uzaqda üfüqdə bir parça da ümid yox idi,

Ayrıseçkilik hər yerdə” xod gedəndə”

Bəzən baxırdıq kasıblığımıza və deyirdik -

Hardasan?

İlk dəfə onda anlamışdım...

Atalar mağazada ən ucuz oyuncaq axtarışında

Biz uşaqlar ən göstərişli bahalısına “cumar”, ağlayardıq.

Kasıb olduğumuzu dərk etdiyim həmin mağazada

Sual etdim o yaşda -

Hardasan?

Sonra elə başa düşdük ki,

Yaxşı adamlar daha ölməyəcəklər...

Elə belə düşünərkən, öz maaşıyla kitab alıb paylayan

Bakılı qonaq da ürək tutmasından öldü.

Həmin gün daha bir mənfur adam zirvəyə qalxmışdı

Və deyirdi camaat -

Hardasan?

İndi müharibələrdə də kişilik yoxdur.

Kişilik onsuz da portmanatın doluluğu ilə həmahəngdir.

Müharibələrdə əsgər vurmaq qəliz görünəndə,

Körpələr kürəklərindən vurulur və analar bağırırdı -

Hardasan?

Heç unutmaram, qoy yazım:

Rusetdən gələn biznesmen oğlu Leyla ilə

Evlənmək arzusundaydı

qızın xalası qulaqlarımın dibində oğlana

öz bacısı qızını pisləyəndə

anladım paxıllıq ölümdən də betərdir...

Söylə, ədalət, - hardasan?

Sevdiyim hər şey puç imiş məgər

Hamışı boş səfsəfə...

Mən isə otaqda ağlayırdım -

Hardasan?

Hərdən boş ümidlərə qapılırdı insanlar.

Tələbələr üçün auditoriyalar boz və darısqal

Çoxu üçün ali təhsil diplomdan ötə deyil.

Eybi yoxdur, bizlər də bir gün dəyər görərik

O günlər, bəs -

Hardasan?

Uğurlarımıza sevinib dar günümüzdə bizi

Mənən bizləyən, inildədən -

Hardasan?

Toyda araq stolunda qohumluğu şaha qalxıb,

Adi günlərdə ölümüzdən xəbər tutmayan

Qohum - Hardasan?

Qeybətlə insanları boğub,

Azadlıqları üzərində gərnəşən,

"bizdən yoxdur" deyə hamını borclu çıxaran

Despot təfəkkürlər!

Haqlılar haqsızlara yeniləndə -

Hardasan?

Ən sonunda hər şeyi xəlq edən sənsənsə,

Və hər kəsin ibadətində varsansa,

dua edirəm bu xalqa

və söyləyirəm -

göylərdən bax və sən də sual ver:

ey insan, bu, sən ola bilməzsən,

axı söylə -

hardasan?!

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG