-
Bu şeirlər "Ədəbi Azadlıq-2015" müsabiqəsinin münsiflər heyətindən bal alsa da, bu, 20-liyə keçmək üçün bəs etməyib.
İltimas Səmimi
YADDAŞ İŞIĞI
Canım ağac, yadındamı,
Kölgəliyinə qoyulmuş
beşiyimin layla qoxusu,
Gözlərimin kəpənək yuxusu,
yadındamı?!
Budaqlarını diksindirən
dodaq-dodaq gülüşüm,
Hələ duz bağlamamış,
yaz yağışı kimi dupduru,
kölgəni bir yarpaq
isladan göz yaşım,
Yadındamı, canım ağac?!
Beşiyimə qonan
kəpənək yuxuların
uçub getdiyi günün işığı,
Ciyərlərimə çəkdiyim
o günkü havanın dadı,
hələ də yadımdadı,
hələ də canımda tərpənir…
Alın yazıma hopub,
O işıq,
O qoxu,
O hənir…
Hər şey yadımdadı, hər şey!
Təkcə, sən yadıma
Gəlmirsən, canım ağac…
Dibinin kölgəliyini,
O kölgəlikdəki körpəliyimi
ətəyindən çırpıb gəlmisən,
canım ağac…
ÜZRXAHLIQ
Misralarımın çiyni üstündən
baxıram dünyaya,
Görürəm, çılpaq həqiqətlər
yiyəsiz it kimi sümsünür küçələrdə.
Qəbrinin bir addımlığında
oturmuş qoca dilənçi
gözləri yol çəkən ovcuna
nəsə danışır
olanlardan, keçənlərdən...
Küçələrin sükutunu hürküdən
addım səslərindən
vətəndaşlıq yağır...
Heyrətim çılpaq qadın kimi
gözlərini tutub
yerə çökür ağır-ağır.
Dünyanı belə görürəm
misralarımın çiyni üstdən,
əgər gözlərim pis görürsə,
şəhid qardaşlar,
üzr istəyirəm qəbrinizdən...
