-
Mayın 21-də Azərbaycanı «Eurovision 2015» mahnı yarışmasında təmsil edən Elnur Hüseynov ikinci yarımfinal mərhələsində səhnəyə çıxır.
Elnur Hüseynov «Hour of the Wolf» mahnısını ifa edəcək.
İkinci yarımfinalda ölkələr bu ardıcıllıqla çıxış edəcək: Litva, İrlandiya, San Marino, Monteneqro, Malta, Norveç, Portuqaliya, Çex Respublikası, İsrail, Latviya, Azərbaycan, İslandiya, İsveç, İsveçrə, Kipr, Sloveniya və Polşa.
Final mayın 23-də baş tutacaq.
Elnur Hüseynov yarışmadan əvvəl Türkiyənin «Hürriyyət» qəzetinə müsahibə verib.
Həmin müsahibəni təqdim edirik.
– «O Ses Türkiye»de birinci olandan dərhal sonra Azərbaycanı «Eurovision»da təmsil etmək təklifi aldın. Nə düşündün?
- Doğurdan çox sürətli oldu. Bir yarışmadan yeni çıxmışdım, bir başqa yarışmada iştirak etmək təklifi aldım. Nəticədə hər ikisi kiçikmiqyaslı işlər deyildi. Çox həyəcan verirdi.
– 2008-ci ildə də ölkəni «Eurovision»da təmsil etmişdin, səkkizinci olmuşdun. Səncə, Türkiyədəki uğurunun ardından «Elnur bu dəfə də iştirak etsin» dedilər?
- Bəlkə də. Təbii, «O Ses Türkiye»dəki qazandığım yerdən təsirlənmiş ola bilərlər...
– Rusiyadakı «The Voice»da yarışmaq imkanın ola-ola, «O Ses Türkiye»ni seçmişdin. Nəyə görə?
– Amsterdamda oxuyan vaxt dostlarım Rusiyadakı müsabiqədə iştirak etmək üçün müsabiqəyə mənim adımdan video göndərmişdilər. Ancaq orada yarışmaq istəmirdim.
– Problem rus dili ilə bağlı idi?
- Xeyir, mən rus dilini bilirəm, rus dilində mahnı da oxuyuram. Ancaq istəmədim. Türkiyə bizim qanımızdır, iki dövlət, bir millətik.
– Rusiyada yer tutmaq karyerana daha çox üstünlük yaratmazdı?
- Bəlkə də... Ancaq əsas olan insanlarla aranızdakı hisslərdir.
– Bu hiss qarşılıqsız deyil. Türk xalqının da gözü-qulağı sizdədir. Küçədə adamlara mikrofonu uzadanda sanki bizim üçün yarışacağsınız kimi «Elnur, o mükafatı, al, gəl» deyirlər. Maraqlıdır, bu durum xüsusi basqı yaratmır ki?
- Əksinə, qürur duyuram. Reklam turunda Stokholmda bir marketə girmişdim. Bəzi şeylər aldım. Pulunu verəndə «Elnur necəsən, heç səndən pul alarıq» dedilər. Çox təsirləndim. Hər şeydən əvvəl özümüzün gücünü-qüvvətini hiss etdim. Heç bir yerdə tək olmadığımı bilirəm.
– Səsvermə ilə bağlı nə düşünürsən? «Hour of the Wolf» xaricdə yaşayan türklərin səslərini ala biləcək?
- Mahnımı sevən, mənim qalib gəlməyimi istəyənlər yəqin ki, səs verəcəklər, niyə verməsinlər... Ancaq xüsusi olaraq mən heç kimdən səs istəmirəm. Mənim üçün əhəmiyyətli olan səsdən çox işimi sevmələri, bəyənmələridir. Səhnədə o hissi vermək, «bu hissəni də nə gözəl oxudu» dedirtmək bəsdir. Ümid edirəm ki, bunu bacaracağam.
– Nəticədə bu, bir yarışmadır. Konsert-filan deyil. Heç stressdən gecələri yuxusuz qaldığın olur?
- Olur. Hətta başım şişib. Bir az da səssiz, sakit vaxt keçirmək istəyirəm.
– Səbrinin sonuna gəlmiş kimisən...
- (Gülür) Bir də gördün, qalib gəldim. Nəticəni eşitdiyim vaxt səhnədə ürəyim də gedə bilər, nə bilmək olar.
– Səni bu qədər yoran nədir?
- Reklam turunda ölkə-ölkə gəzdik, danışdıq. Həmin müddətdə tək qalmağım mümkün deyildi. Bu belə məni yordu. Ancaq nə olursa, olsun, bu yolu keçməliyəm.
– Yolu keçsən, nə olacaq?
- Bütün xəyallarımı, istəklərini həyata keçirəcəyəm.
– Yarış qurtarar-qurtarmaz İstanbula gəlib albom çıxaracağını eşitdim.
- Doğrudur. Həm də birini yox, ikisini birdən...
- Necə yəni?
- Albomun birini Avropa yayılması üçün hazırlayırıq. Biri də tamam türkcə olacaq.
- Türkcən necədir?
- Getdikcə yaxşılaşır. Bir il əvvəl türkcə heç nə bilmirdim. Danışmağı «Muhteşem Yüzyıl»a baxıb öyrənmişəm. İndi getdikcə daha yaxşılaşır.
- Bəs neçə dil bilirsən?
- Azərbaycanca, türkcə, ingiliscə, rusca, bir az da polyakca... Ancaq türkcə pop mahnılardan çox türkü oxuya bilmək istəyirəm. Ebru Gündeş-dən mənə bu işin texnikasını öyrətməsini istəyəcəyəm.