-
Bu şeirlər "Ədəbi Azadlıq-2015" müsabiqəsinin münsiflər heyətindən bal alsa da, bu, 20-liyə keçmək üçün bəs etməyib.
Nəriman Tolışi
YOL
I
Yol,
ulu yol.
Sevgiylə dolu yol.
Bir zaman
qollarını açıb
üstümə qaçardın.
Arzuma,
ümidlərimə
ömrümə işıq saçardın.
II
Yol,
xəstə yol.
Xəyanət etdin dosta, yol.
Artıq
heç yol da deyilsən.
Sənə yalnız istiqamət demək olar.
III
Yol,
ölü yol.
Ayrılığın,
sükütün qulu yol.
Düşmən keçdi səndən...
Talan keçdi,
yalan keçdi...
Külbaşının göz yaşı da
islatmaz qəbir daşını.
Barı öləydin ölənlər kimi,
üzüsulu, yol.
***
Fikrin ağzını cırmaq
tərbiyəsizlikdi, cənablar.
Siz bunu bilməzsiniz.
Onsuz da
həbsdədi dilim ağzımda.
Ürəyim bulanır,
söz udmaqdan.
Açın qardaşımın qollarını,
zəncir çeynəməyim gəlir.
Məmləkətin başçılarının eynək taxmaları
daha məntiqlidir.
Xalq utanır
gözsüz sifət görməkdən.
Heç olmasa,
azadlığı parodiya edən ölkədə
yaşamaq
keçir ürəyimdən.
Yoxsa,
insan olmaqdan
istefa edəcəyəm.
