Avropa İnsan Haqları Məhkəməsi fransız erotik romanını qadağan etdiyi üçün Türkiyənin əleyhinə qərar çıxarıb.
Məhkəmə Türkiyə nəşriyyatlarının birinin rəhbəri Rəhmi Akdasın şikayətini əsaslı sayıb. (DPA)
O, 2004-cü ildə fransız yazarı Giyom Apollinerin (1880-1918) «11 min çubuq» romanını Türkiyə türkcəsində çap etdiyi üçün 684 milyon lirə (təxminən 1500 dollar) məbləğində cərimə edilmişdi.
Ona qarşı ittiham “əxlaqsız materialların çapı və insanların seksə meylini qızışdırmaqla bundan sui-istifadə etmək” idi.
«11 min çubuq» romanı ilk dəfə 1907-ci ildə Fransada nəşr edilib.
İndi də onu Qərb ölkələrində və on-line satış şəbəkələrində almaq olar.
Məhkəmənin qərarına görə, “əsərdə seksual əlaqənin açıq şəkildə təsvir edildiyi səhnələr var və həmin səhnələrdə sadomazoxizm, yaxud vampirizm məqamları mövcuddur”.
Amma məhkəmə iddiaçının izahını qəbul edib.
Nəşriyyat rəhbəri öz iddiasında bildirirdi ki, “bu bir bədii əsərdir və onun yumoristik və mübaliğəli xarakterinin seksə meyli qızışdırmasını yox, əksinə azaltmasını güman etmək olar”.
Amma Avropa İnsan Haqları Məhkəməsi naşiri haqlı saysa da, Türkiyənin ona kompensasiya ödəməsi haqda tələbini yerinə yetirməib.
Apolliner 20-ci əsrin əvvəli Avropa avanqardının tanınmış simalarından sayılır. O həm də şeirləri ilə tanınır.
"Sürrüalist" termini ona məxsusdur.
Apolliner 1916-cı ildə 1-ci Dünya Müharibəsi zamanı cəbhədə başından yaralanıb.
Cərrahiyyə əməliyyatlarından zəifləmiş yazar 1918-ci ildə ispan qripindən vəfat edib.