Mircəfər Bağırov1956-cı il aprelin 12-də Azərbaycanın kommunist rəhbərləri üzərində başlayan məhkəmə nəyi üzə çıxardı və nələr qaranlıq qaldı?
1956-cı il aprelin 12-də Bakıda keçmiş Dzerjinski adına klubda (indiki Şəhriyar Mədəniyyət Sarayında) Azərbaycan Kommunist Partiyasına 20 ilədək rəhbərlik etmiş Mircəfər Bağırovun məhkəməsi başlayıb.
Həmin il aprelin 26-dək sürən məhkəmə kommunist rəhbərlər Bağırov, Markaryan, Qriqoryan və Borşov haqqında ölüm hökmü çıxardı. Digər rəhbər şəxslər – Atakişiyev və Yemelyanovu 25 illik həbs cəzasına məhkum edildi. Bu məhkəmə Stalin repressiyalarına hüquqi qiymət verilməsi baxımından (bütün yarımçıqlığına, yarıqapalı şəraitinə və siyasi hay-küyünə baxmayaraq) önəmli bir tarixi olay idi.
«İz» proqramının bu sayında sözügedən dövrün tanınmış araşdırıcısı tarixçi alim professor Eldar İsmayılov «Kim idi Mircəfər Bağırov? Bu ad nədən ya qorxu qarışıq nifrət, ya da bəzilərində heç cür gizlədə bilmədikləri xiffət doğurur? 1956-cı il aprelin 12-də Azərbaycanın kommunist rəhbərləri üzərində başlayan məhkəmə nəyi üzə çıxardı və nələr qaranlıq qaldı?» və s. suallara aydınlıq gətirməyə çalışır.
Azərbaycanın yaxın tarixinin bu gün də önəmini itirməyən bəzi gerçəkləri öyrənmək istəyirsinizsə, «Azadlıq» radiosu sizə bu şansı yaradır: «Səs» bölməsini «tıkla»yın və dərhal 53 il öncənin bütün dünyada səs salmış olayından geniş xəbər tutun.
«Mir Qəzəbin məhkəməsi» adlanan bu «İz»də totalitarizm barədə sovet həbs düşərgələrində yayılmış deyimlərlə, Nobel mükafatçısı V. Nabokovun unudulmaz fikirləri ilə və başqa unudulmaz açıqlamalarla da tanış ola bilərsiniz.