«Azərbaycan konstitusiyası işlək qanun deyil»-, bu fikirləri Hüquq Maarifçilik Cəmiyyətinin sədri İntiqam Əliyev deyir. O, 13 il əvvəl qəbul olunan Konstitusiyanın bu müddət ərzində bir kağız parçasından fərqlənmədiyi iddia edir. İntiqam Əliyevə görə, vətəndaşlar öz konstitusion hüquqlarından istifadə edə bilmirlər:
«O, formal olaraq qəbul olunub və insanlar oradakı çoxsaylı hüquqlardan sadəcə olaraq istifadə edə bilmirlər. Birləşmək, toplaşmaq, mənzil, mülkiyyət, ədalətli məhkəmə araşdırması, azad seçim etmək və s. hüquqların pozulmasından danışmaq olar. Azərbaycan vətəndaşı Fransa, Almaniya, İngiltərə vətəndaşı kimi ölkəsində konstitusion hüquqların qorunması sarıdan qürrələnə bilməz».
İntiqam Əliyev hesab edir ki, elə konstitusiya imkan yaradır ki, hakimiyyət bir nəfərin əlində cəmləşsin. Hüquqşünas prezidentə konstitusiyayla tanınan çoxsaylı səlahiyyətlərə toxunur və bildirir ki, əslində bu səlahiyyətlər məhdudlaşdırılmalıdır.
Müsahibimizin fikrincə, vətəndaşların öz hüquqlarını yetərincə müdafiə etməməsi problemi var və həm də bu hüquqlar kifayət qədər təbliğ olunmur.
Hüquqşünasın konstitusiyanın təbliğ olunmamasıyla bağlı fikirlərini Yeni Azərbaycan Partiyasının Gənclər Birliyinin sədri Ramil Həsənov da bölüşür. O hesab edir ki, konstitusiya hüquqlarının təbliği orta məktəbdə daha güclü tədris olunmalıdır:
«Hələ yeniyetmə, gənc ikən hansı insanın cəmiyyətdə hansı hüquqlara sahib olduğunu öyrənməsi sonradan onun vətəndaş kimi formalaşmasına böyük kömək edər».
Amma Ramil Həsənov konstitusiya hüquqlarının kütləvi pozulmasıyla bağlı deyilənlərlə razı deyil. Onun fikrincə, hakimiyyətin bütün qolları öz işlərini məhz Əsas Qanuna söykənən qanunlar üzərində qurduğu üçün onu işlək mexanizm saymaq olar. Ramil Həsənov günahı vətəndaşların öz hüquqlarını bilməməsində görür:
«İnsanların özündən də çox şey asılıdır. İnsanlar öz hüquq və azadlıqlarını yetərincə bilməli və dərk etməlidirlər ki, ondan necə istifadə etməyin formaları və metodları barədə danışa bilsinlər».