«Veb-kameralardan effektiv istifadədə problemlər yaşanıb»

«Veb-kameralardan effektiv istifadədə problemlər yaşanıb». «Seçki 2008» QHT Koalisiyasının mətbuat üçün məlumatında belə deyilir.

 

Ölkə üzrə 500-dək seçki məntəqəsində səsvermə prosesini canlı olaraq məsafədən izləmək üçün veb-kameralar quraşdırılıb:

 

«Günün başlanğıcında kameraların işində ciddi əngəllərə rast gəlinməsə də, günortaya doğru bir çox məntəqələrdəki kameralar vasitəsilə prosesi izləmək imkansız olub».

 

Koalisiya həmçinin MSK-nın saytında xəbər qıtlığının olduğunu bildirir:

 

«MSK-nın xəbərləri başqa internet saytlarında yayılsa da, qurumun öz saytında bu imkan təmin edilməyib. Oktyabrın 14-də hər hansı texniki-texnoloji problemin olmayacağı rəsmən elan edilsə də, səsvermə günü MSK bu cür problemlər üzündən səsvermənin gedişi ilə bağlı ilkin informasiyanı təxminən iki saat gecikmə ilə verib».

 

Saat 16.30-a qədər Koalisiyanın «qaynar xətt»inə 53 müraciət daxil olub. Bunlar əsasən seçki məntəqələrinin yerinin dəqiqləşdirilməsi, seçici siyahılarındakı adların evlərə göndərilən bildirişlərlə üst-üstə düşməməsi ilə bağlıdır.