Yerevanda avtobusu partlatmaqda şübhəli bilinən şəxs qohumlarını öldürmək istəyirmiş.
Bu barədə “İnterfaks” agentliyi Ermənistan istintaq komitəsi sədrinin müşavirinə istinadla xəbər yayıb.
Məlumata görə, milli təhlükəsizlik xidmətinin operatif axtariş-əməliyyat tədbirləri nəticəsində partlayış yerindən tapılan telefon kartından məlum olub ki, onun qohumları ilə məişət zəmnində mübahisəsi olub və o, partlayışla qisas almağı planlaşdırırmış.
İstintaq komitəsi bundan əvvəl bunun terror aktı olmasına sübut tapılmadığını bildirmişdi.
Aprelin 25-də Yerevanın mərkəzi rayonlarından birində avtobusda baş vermiş partlayışda 2 nəfər həlak olub, 8 nəfər yaralanıb.
Ermənistandan alınan son xəbərlərdə bildirilirdi ki, partlayışının səbəbi bomba olub..
Ermənistan polisinin rəhbəri Vladimir Qasparyana istinad edən yerli xəbər agentlikləri partlayışın qəlpə yox, dalğa xarakterli olduğunu bildirirlər.
Rəsmi məlumatlarda deyilir ki, partladıcı qurğu böyük bir ehtimalla sərnişin oturacaqlarından birinin altına qoyulubmuş.
Partlayış anı təhlükəsizlik kameralarına da düşüb.
Partlayış Alabyan küçəsində yerli vaxtla 21.00 radələrində baş verib.
