ABŞ rəsmiləri Əfqanıstandakı Talibanın lideri Molla Akhtar Mansour-ın “çox güman hava zərbəsilə öldürüldüyünü” xəbər veriblər.
Məlumatda deyilir ki, o və daha bir kişi Pakistanın Əfqanıstan sərhədinə yaxın ucqar bölgəsində maşınla gedərkən vurulublar.
Pentaqon spesifik olaraq Mansour-un hədəfləndiyini təsdiq edib, lakin bildirib ki, hava zərbəsinin nəticələri qiymətləndirilir.
Mansour 2015-ci ilin iyulundan liderlik postunda Talibanın banisi və ruhani lideri Molla Mohammad Omar-ı əvəz edirdi.
Obama-nın əmri ilə
Bu əməliyyat prezident Barack Obama-nın göstərişi ilə şənbə günü Əhməd Val şəhəri yaxınlığında həyata keçirilib.
Qərb mediası bildirir ki, əvvəllər Taliban liderlərinin məhv edildiyi barədə təsdiq olunmayan xəbərlər yayılıb.
Məsələn, Molla Omar 2013-cü ildə ölsə də Taliban bu xəbəri yalnız 2 ildən sonra təsdiq edib.
Molla Mansour-un özünün ölüm xəbəri hələ ötən il yayılsa da, Əfqanıstan hökuməti bunu təkzib etmişdi.
Bu da xəbər verilir ki, Mansour-un liderliyə təyinatı Taliban rəhbərliyində birmənalı qarşılanmamışdı.
Taliban 2014-cü ildə Beynəlxalq qoşunlar bu ölkəni tərk edəndən bəri Əfqanıstanda bir sıra hərbi uğurlar əldə edib.
Molla Mansour kimdir?
Uzun müddət Taliban liderinin əvəzi kimi fəaliyyət göstərmiş Mansour Molla Omarı-ın yaxın silahdaşı kimi tanınır.
O 1960-cı illərdə Qəndəharda doğulub və Taliban bu ərazidən çıxarılandan sonra əyalətin “kölgə qubernatoru” təyin edilib.
Əfqanıstanın Taliban hökumətində mülki aviasiya naziri vəzifəsində işləyib.
BMT-nin məlumatna görə narkotik maddələrin ixracatında əsas rollardan birini oynayıb.
2010-cu ildə Mansour olduğunu iddia edən bir nəfər prezident Hamid Karzai ilə danışıqlar aparsa da, sonradan onun qondarma şəxs olduğu üzə çıxıb.