İlham Əliyev "kral"ı işdən çıxardı

►Prezident İlham Əliyev Salyanın qalmaqallı icra başçısı Tahir Kərimovu vəzifəsindən azad edib.

Prezidentin saytı xəbər verir ki, İlham Əliyevin martın 4-də imzaladığı sərəncamla Sevindik Hətəmov Yardımlının icra başçısı vəzifəsindən azad edilərək Salyan rayonuna təyin olunub.

Salyan rayonunun sabiq icra başçısı bir müddət əvvəl gül paradı ilə gündəmə gəlmişdi.

Ölkə KİV-lərində yayılan fotolardan görünürdü ki, Tahir Kərimov məktəblilərin tutduğu qızılgüllərin altından keçir.

Hətta o vaxt sosial şəbəkələrdə bunu şəxsiyyətə pərəstişin böyük nümunəsi kimi də dəyərləndirmişdilər. Onu kral və sultanlarla müqayisə etmişdilər. Ancaq Salyan rayon icra hakimiyyəti belə iddiaları təkzib etmişdi. O vaxt İcra hakimiyyətindən bildirilirdi:

____________________________________________________________

Bunlara da bax:

• Polisə işləyənlərə geyim forması, döş nişanı veriləcək

• Gözlə görünməyən və çox yüngül günəş batareyaları hazırlanıb

____________________________________________________________

“Həmin foto 9 may 2014-cü ildə Salyan şəhərində Gül bayramı ilə bağlı keçirilmiş tədbir zamanı çəkilib. 10 may Gül bayramı ilə əlaqədar Salyan rayonunun təhsil müəssisələrinin hazırladıqları tədbir zamanı oraya gələn bütün şəxslər, bu gül çələnginin altından keçib sərginin keçirildiyi məkana daxil olublar. Fotodan da görünür ki, Tahir müəllimin yanında hüquq mühafizə orqanlarının rəhbərləri də var”

Prezident bir gün əvvəl isə Cəbrayıl və Laçın rayon İcra Hakimiyyəti başçılarını işdən azad etmişdi.

ANS televiziyasının reportajında hadisənin şərhi.