Hava məlumatları qeydə alınandan bəri ötən iyul Yer kürəsinin ən isti ayı olub.
Amerika alimlərinin hesablamalarına görə iyul ayında bütün planet üzrə orta hesabla 16, 6 dərəcə hərarət qeydə alınıb.
Bu, 1998-ci ildə iyul ayı üçün qeydə alınmış son rekorddan 0,08 dərəcə çoxdur.
ABŞ-ın Milli Okean və Atmosfer Administrasiyasından (US National Oceanic and Atmospheric Administration - NOAA) olan ekspertlərin hazırladıqları hesabatda deyilir ki, 2015-ci ilin də ən isti il olacağı gözlənilir.
Hesabata görə 1880-ci ildən bəri qeydə alınmış 10 ən isti ayların doqquzu 2005-ci ildən sonrakı müddətə düşür.
Alimlər bu qənaətədirlər ki, iqlim dəyişikliyi və El Nino fenomeni rekord istiliyin başlıca səbəbləridir.
Britaniyadan alınan xəbərlərdə isə qeyd olunur ki, iyulun 1-də Londonda temperatur rekord 36, 7 dərəcə olub.
İstilik dalğası Avropanın başqa şəhərlərini də bürüyüb. Afrika qitəsində iyul ayı üçün ikinci rekord göstərici qeydə alınıb.