Nardaran sakini Fail Şahbazov noyabrın 23-də səhər saatlarında Sabunçu rayonu 42-ci polis bölməsinə aparılıb. Axşama qədər onun yaxınlarına saxlanmasının səbəbi barədə heç bir bilgi verilməyib. Yalnız axşam bildirilib ki, F.Şahbazov məhkəmənin qərarı ilə 30 sutka inzibati həbs cəzası alıb.
«CƏZALANDIRILIB»
Bu haqda AzadlıqRadiosuna «Nardaran işi» üzrə təqsirləndirilən şəxslərdən bir neçə nəfərin, o cümlədən «Müsəlman Birliyi» Hərəkatının sədri Taleh Bağırovun vəkili Yalçın İmanov məlumat verib. Vəkil deyir ki, F.Şahbazovun nəyə görə cəzalandırıldığı deyilməyib.
Müdafiəçi bu hadisənin «Nardaran işi» məhkəməsinə gələnlərə təzyiqlərin tərkib hissəsi olduğunu istisna etmir.
Ötən məhkəmə iclaslarının birində Taleh Bağırov bildirmişdi ki, məhkəməyə gələn qəsəbə sakinləri, hətta təqsirləndirilən şəxslərin yaxınları belə, polisə çağrılıb təhdid olunur.
Təqsirləndirilən İbrahim Xəlilovun dediyinə görə, qaynını polisə çağırıb, ondan bacısının öz həyat yoldaşının məhkəməyə getməməsini tələb ediblər.
«Fail Atabala oğlu Şahbazov da daim bu məhkəmə prosesinə gəlirdi. Bu baxımdan, istisna olunmur ki, o da məhkəməyə gələnlərə qarşı təzyiqlər kontekstində cəzalandırılıb. Adamı çağrıblar, o da könüllü şəkildə gedib. Ola bilsin ki, qərarda inzibati həbsin səbəbi olaraq polisə müqavimət, yaxud küçədə ünvansız söyüş söyməsi kimi halları göstərsinlər. Amma bu, səbəb deyil, sadəcə, qanunsuz həbsi rəsmiləşdirmək üçün bəhanə ola bilər», - vəkil bildirib.
XATIRLATMA
Ötən il noyabrın 26-da Nardaran qəsəbəsində keçirilən xüsusi əməliyyatda, ikisi polis, 6 şəxs həlak olub. Rəsmi bilgilərə görə, «Müsəlman Birliyi» Hərəkatının 70-dən çox tərəfdarı həbs edilib (Hüquq müdafiəçilərinin siyahısında bu rəqəm 87 göstərilir). Daha yüngül maddələrlə ittiham edilənlərin məhkəməsi başa çatıb. Həmin şəxslər 1 il 6 aydan 6 il 6 ayadək həbs cəzası alıblar. Taleh Bağırov, Abbas Hüseynov və daha 16 nəfərin məhkəməsi ayrılıqda davam edir. T.Bağırov və onunla saxlananlar qətldə və daha bir neçə çox ağır cinayətdə təqsirləndirilir. Təqsirləndirilən bu ittihamları rədd edir, onlardan ifadələrin işgəncə altında alındığını bildirirlər.
Məhkəmədə zərərçəkən kimi ifadə verən DİN Baş Mütəşəkkil Cinayətkarlıqla Mübarizə İdarəsinin əməkdaşları «Nardaran işi»ndə həbs olunanlara işgəncə verilməsi ilə bağlı deyilənləri təkzib ediblər.
