Keçid linkləri

2024, 19 Mart, çərşənbə axşamı, Bakı vaxtı 12:48

'Motorolla'-ya görə restoran bağlanıb, aşbaz qaçıb


 "Motorola"
"Motorola"

“Facebook” sosial şəbəkəsində bir şərh Rusiyanın Sankt Peterburg şəhərində fəaliyyət göstərən məşhur bir restoranın bağlanması, onun baş aşbazınınsa yoxa çıxmasıyla sonuclanıb.

Hər şey Ukrayna separatçılarının səhra komandirlərindən olan Arseny Pavlov-un öldürülməsi ilə başlayıb. “Motorola” ləqəbi ilə tanınan Arseny Pavlov oktyabrın 16-da öz evinin liftində sui-qəsdlə qətlə yetirilib. Separatçı rejim onu milli qəhrəman kimi dəfn edib.

“Üzr istədim”

Səhəri gün Grigory Pashukevich adlı rusiyalı bir gənc “Facebook”da separatçı ilə bağlı bir postun altında şərh yazıb. Həmin gəncin şərhi vaxtilə avtomobil yumaqla məşğul olmuş bir şəxsin indi milli qəhrəmana çevrilməsiylə bağlı olub. O, şərhində jarqon da işlədib.

Özünün dediyinə görə, post müəllifi onunla təkbətək yazışmasında ölənin arxasınca nalayiq ifadələr işlətməyin doğru olmadığını, şərhi silməsini xahiş edib.

“Dərhal, şərhi pozub, mərhumun yaxınlarından üzr istədim. Doğrudan da, “Motorola”nın Ukrayna torpaqlarındakı fəaliyyətinə necə yanaşmamdan asılı olmayaraq, işlətdiyim ifadələr doğru deyildi”.

Grigory Pashukevich AzadlıqRadiosunun rus xidmətinə müsahibəsində belə deyib.

Şərh müəllifin kabusuna dönür

Ancaq peşmançılıq fayda verməyib. “Komsomolskaya Pravda” qəzetinin hərbi müxbiri Dmitry Steshin öz “Twitter” hesabında Pashukevich-in sözügedən şərhini paylaşıb. 85 min izləyicisindən bu barədə fikrini bölüşməyi xahiş edib. Jurnalist Pashukevich-in baş aşbaz işlədiyi restoranın adını və ünvanını da yazıb. Bununla da onu birbaşa hədəfə çevirib.

boş qalan Citizen restoranı
boş qalan Citizen restoranı

Bundan sonrası Pashukevich-dən ötrü bir kabusa çevrilib. Həm telefon, həm də internet vasitəsilə ölüm təhdidləri almağa başlayıb. Hərbi müxbirin postu 300 dəfədən artıq paylaşılandan sonra oktyabrın 18-də restoran Pashukevich-in işdən çıxarıldığını açıqlayıb. Bir gün sonra isə hədə-qorxular ucbatından restoran özü də bağlanmalı olub.

Pashukevich isə hazırda ailəsi ilə birgə gizlənməyə məcburdur. O, “Komsomolskaya Pravda” jurnalistinin son qurbanı olmayıb. Okyabrın 21-də Steshin “Motorola” haqda satirik şeirlər yazan başqa bir gənc – Voronej sakini Sergei Kalin-in barədə məlumat yayaraq, izləyicilərini reaksiya verməyə çağırıb.

Rusiya separatçıları dəstəkləməyə Ukraynaya hərbçi göndərmədiyini iddia etsə də, Kiyev və NATO Moskvanın Şərqi Ukraynadakı separatçıları silah, pul və hətta canlı qüvvə ilə təchiz etdiyinə dair təkzibolunmaz sübutlara malikdir.

'Motorola', Donetsk hava limanı 21 yanvar 2015
'Motorola', Donetsk hava limanı 21 yanvar 2015

Kimdir bu “Motorola”?

Elə qətlə yetirilmiş “Motorola” ləqəbli Arseny Pavlov da milliyətcə rus olub. Çeçen müharibəsində rus ordusunun tərkibində döyüşüb. Ukrayna müharibəsində Sparta batalyonuna başçılıq edib. Əsir düşmüş 25 ukraynalı əsgəri güllələməklə tanınıb. Qondarma Donetsk Xalq Respublikası bu qətlin ukraynalı sabotajçıların işi olduğunu söyləsələr də, Kiyev bunun Rusiyanın xüsusi xidmət orqanlarının əməyinin məhsulu olduğunu bildirir. Belə ki, Kreml Rusiyadan getmiş batalyon komandirlərini bir-bir aradan götürməklə, onların yerinə yerlilərin keçməsinə və bununla da, münaqişədə hər hansı rus izinin qalmamasına çalışır. Rusiya bu yolla həmçinin müharibə dövründə şöhrət qazanmış, hazırkı atəşkəs dövrdə isə qeyri-qanuni biznesə nəzarətlə məşğul olan ərköyün səhra komandirlərindən canını qurtarır.

Motoroladan öncə Oplot batalyonunun yaradıcısı Yevgenu Zhilin, Batman batalyonunun lideri Aleksandr Bednov və Prizrak briqadasının komandiri Aleksey Mozgovoy da öldürülmüşdü.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

Abunə

XS
SM
MD
LG