Yeni sorğular Rusiyada Qərblə münasibətlərin yaxşılaşmasını istəyənlərin artdığını göstərir. Rusiyanın «Levada» müstəqil sorğu mərkəzinin araşdırmaları üzə çıxarıb ki, belələrinin sayı keçən illə müqayisədə xeyli çoxdur.
NATO-DAN QORXMAĞA ƏSAS VARMI?
Sorğuya qatılanların 71%-i Rusiyanın Qərblə geniş iqtisadi, siyasi və mədəni əlaqələr yaratmasını arzuladığını söyləyib. Keçən il bu arzunu 50% dilə gətirmişdi. Sorğu iştirakçılarının cəmi 17%-i Qərblə əlaqələri kəsməyin tərəfdarı olduğunu bildirib. Ötən il sorğuya cəlb edilənlərin 37%-i bunu arzulamışdı.
«Levada» sorğuda NATO-ya münasibəti də aydınlaşdırmağa çalışıb. Respondentlərin 52%-i bildirib ki, NATO üzvlərinin Rusiyadan qorxmasına əsas yoxdur. 31% NATO-nun Rusiyadan qorxmalı olduğunu söyləyib.
«Rusiyanın NATO-dan qorxmağa əsas varmı» sualına cavab verənlərin 57%-i «hə», 31%-i «yox» deyib.
51% QƏRBİ VECİNƏ ALMIR
Rusiyanın beynəlxalq məsələlərin həllində roluna gəlincə, rusların çoxu ölkəsinin əhəmiyyətinin böyük olduğunu düşünür. Respondentlərin 70%-i Rusiyanın beynəlxalq məsələlərdə mühüm rol oynadığına əmindir. Cəmi 26% rusların rolunun əhəmiyyətli olmadığını söyləyib.
Sorğunun nəticələri göstərir ki, Qərbin onların haqqında nə düşündüyü ruslardan ötrü bir o qədər vacib deyil. Respondentlərin 44%-i Qərbin Rusiya haqda fikrini vacib sayıb, 51%-i qərbdəkilərin yanaşmasının onlardan ötrü əhəmiyyət daşımadığını söyləyib.
«Levada» mərkəzi sorğunu həm kəndlərdə, həm də şəhərlərdə apardığını, yaşı 18-i keçmiş 1600 Rusiya vətəndaşına şəxsən sual verildiyini yazır.
Sorğu 2016-cı ilin noyabrında keçirilib.