Rusiya mediasında yayılan xəbərlərə görə, Kollektiv Təhlükəsizlik Müqaviləsi Təşkilatı (KTMT) yekdilliklə hazırkı baş katib, Rusiya nümayəndəsi Nikolay Bordyujanın sədrlik müddətini 2017-ci ilədək artırıb.
Beləliklə, rotasiya üzrə baş katibliyi qəbul etməli olan Ermənistan prezidenti Serj Sarkisyan azı bir il gözləməli olacaq.
Sarkisyan bildirib ki, bu, KTMT-də bir sıra təşkilati məsələlər, o cümlədən katiblikdə kvota vəzifələrinin yaradılması ehtiyacı ilə bağlıdır.
Maraqlıdır ki, dekabrın 21-də KTMT-də bu qərar qəbul edilələrkən təşkilatın “dar çevrədə” keçirilən görüşündə Rusiya prezidenti Vladimir Putin də iştirak edib.
Vəzifə müddətinin bir il artırılmasının səbəblərini Nikolay Bordyujanın özü də izah etməyə çalışıb.
O deyib ki, 2016-cı ildə KTMT rotasiyalı sədrlik sisteminə keçməli və Ermənistan prezidenti Serj Sarkisyan baş katib olmalı idi, “lakin vəzifələrin bölüşdürülməsi zamanı qarşıya çıxmış problemlərlə, habelə yaranmış vəziyyətlə, o cümlədən Suriya böhranı ilə bağlı” sədrlikdə dəyişilik etməmək barədə prezidentlər səviyyəsində yekdil qərar qəbul olunub.
Elə bu görüşdə Dağlıq Qarabağ münaqişəsi ilə bağlı yaranmış vəziyyət də müzakirə olunub.
Bütün Qafqaz partlaya bilər
“Biz bu gün, həm də Qafqazda baş verən hadisələri böyük həyəcanla izləyirik, - deyib Bordyuja, - Söhbət xüsusilə də Dağlıq Qarabağ münaqişəsindən və təmas xəttindən gedir. Orada artıq ağır silahlardan və tanklardan istifadə olunur”.
Bordyuja: Söhbət xüsusilə də Dağlıq Qarabağ münaqişəsindən və təmas xəttindən gedir. Orada artıq ağır silahlardan və tanklardan istifadə olunur
KTMT baş katibinin sözlərinə görə, “kifayət qədər qaynar vəziyyətdə olan münaqişənin tammiqyaslı müharibəyə çevrilməməsi üçün təşkilatın bütün siyasi resurslarından istifadə edilməlidir”.
“Bu gün, bu çox qorxulu bir perspektiv olardı, çünki bütün Qafqazı partlada bilərdi” – deyib Bordyuja.
O deyib ki, münaqişə bütün siyasi vasitələrlə, xüsusilə də prezidentlərin nüfuzundan istifadə edilməklə həll olunmalıdır.
Bordyuja bir daha münaqişə tərəflərini ağır silahlardan istifadədən çəkinməyə çağırıb.
Rusiyanın təşəbbüsü ilə 2002-ci ildə yaradılmış KTMT-yə Rusiya, Belarus, Qazaxıstan, Tacikistan, Qırğızıstan və Ermənistan daxildir.
Özbəkistan bu təşkilatda üzvlüyünü 2012-ci ildə dayandırıb.
2015-ci il ərzində KTMT rəhbərliyi səviyyəsində verilmiş bəyanatlarda təşkilatın Dağlıq Qarabağ münaqişəsinə yalnız siyasi perspektivdən yanaşdığı ifadə olunub.
