Keçid linkləri

2024, 29 Mart, Cümə, Bakı vaxtı 04:14

ABŞ Konqresində 'Azərbaycan lobbiçiliyini faş edən' quruma toxunmadılar


ABŞ Konqresinin 2017-ci ildə ilk sessiyası
ABŞ Konqresinin 2017-ci ildə ilk sessiyası

ABŞ-da respublikaçıların çoxluğa malik olduqları Konqres özünün ilk sessiyasına qalmaqalla başlayıb.

Respublikaçı millət vəkilləri Konqresin müstəqil Etika Ofisinin (OCE) səlahiyyətlərinin məhdudlaşdırılması məsələsini səsverməyə çıxarmaq barədə qərar qəbul etmişdilər, lakin bu xəbərdən dərhal sonra ictimaiyyətdən, siyasətçilərdən və insan haqları fəallarından sərt reaksiya gəldi.

Prezident seçilmiş Donald Trump bu qərarı Tvitterdə tənqid etdikdən sonra isə onun partiyadaşları bu təşəbbüsdən geri çəkildiklərini elan ediblər.

Trump-ın andiçmə mərasimi yanvarın 20-də olacaq və indi, respublikaçılar 2007-ci ildən bəri ilk dəfə olaraq həm Ağ Evə, həm də Konqresə nəzarət edəcəklər. Odur ki, onlar prezident Barack Obama-nın Obamacare kimi tanınan səhiyyə sisteminin və başqa islahatların ləğvini səsə qoymağı planlaşdırırlar.

Lakin Konqres üzvlərinin etik davranışlarına gözətçilik edən Etika Ofisinin səlahiyyətlərinin məhdudlaşdırılması barədə təşəbbüs hətta bir çox respublikaçıları da hərəkətə gətirib.

Səsvermə təşəbbüsündə bulunanlar Konqres Etika Ofisinin təhqiqat səlahiyyətlərindən məhrum edilməsini istəyirdilər.

Donald Trump partiyadaşlarının bu təşəbbüsünü kəskin tənqid edib və deyib ki, “indi vergi islahatı, səhiyyə və başqa daha mühüm məsələlər var”.

Azərbaycanda yaxşı tanınan qurum

Konqresin etika qurumu 2008-ci ildə millət vəkilləri ilə bağlı bir sıra korrupsiya qalmaqallarının ardınca yaradılmışdı.

ABŞ Konqresinin müstəqil qurumu Azərbaycana səfər etmiş konqresmenlərin davranışını araşdırmışdı
ABŞ Konqresinin müstəqil qurumu Azərbaycana səfər etmiş konqresmenlərin davranışını araşdırmışdı

Reuters agentliyi yazır ki, hətta Trump-ın tənqidindən əvvəl də bir çox respublikaçı Konqres vəzifəliləri qanunvericilik təşəbbüsününün nəticələrindən narahatlıq ifadə etmişdilər, lakin yalnız Trump-ın tvitindən sonra təcili yığıncaq keçirilib və təşəbbüs geri götürülüb.

ABŞ Konqresinin Etika Ofisi Azərbaycan hökumətinin Amerika millət vəkillərini ələ almaq cəhdlərini araşdırmış, nəticədə Azərbaycana pulu ödənilmiş səfərə çıxan bir sıra konqresmenlər rəsmi Bakıdan aldıqları hədiyyələri böyük rüsvayçılıqla geri qaytarmışdılar.

2016-ci ilin iyununda məlum olmuşdu ki,hazırkı Konqresin 9 üzvünə və 32 əməkdaşına Bakıda keçirilən konfransda iştirak etdikləri vaxt minlərlə dollar qiyməti olan hədiyyələr verilib.

Konqresin Etika Ofisi 2013-cü ilin mayında Azərbaycan hökumətinin SOCAR vasitəsilə Bakıda keçirilən bir tədbirə sponsorluğunu da araşdırmışdı.

SOCAR Texasda mənzillənən «Azərbaycanın Dostlar»ı alyansına 750 min dollar köçürmüş, bu alyans isə ABŞ konqresmenlərinin həmin konfransda iştirakına sponsorluq etmiş, onlara Bakıda bahalı hədiyyələr də verilmişdi.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG