Noyabrın 19-da Salyan Rayon Məhkəməsinin qərarı ilə cəzasının çəkilməmiş hissəsindən azad olundu
Emin Milli: «Bu, sadəcə ədalətsizlik idi»
Həbsdə olan bloqqer Emin Milli də azadlıqdadır.
Noyabrın 19-da Salyan Rayon Məhkəməsi bloqqer Emin Millinin həbs müddətinin yarısını bitirdikdən sonra azadlığa buraxılması ilə bağlı şikayətinə baxıb və onun azad edilməsinə dair qərar verib.
Emin Milli AzadlıqRadiosuna deyib ki, o, bu məhkəmədən hər cür qərar gözləyirmiş:
“Bu, sadəcə bir ədalətsizlik idi. Hamıya, xüsusilə də jurnalistlərə təşəkkür edirəm bu ədalətsizliyi bu qədər işıqlandırdıqları üçün. Məncə, kiçik bir ədalətsizlik də bu qədər işıqlandırılanda cəmiyyətin inkişafına çox böyük töhfə olur. Ümid edirəm ki, bizim bu proses də Azərbaycanda insan hüquqlarının daha da yaxşı qorunmasına, gənclərin öz gücünə inanmasına gətirib çıxardacaq, nəinki əks prosesə”.
Emin Milli bu məsələ ilə bağlı Avropa İnsan Hüquqları Məhkəməsinin qərarını gözləyəcəklərini deyir.
“Hər bir insanın arzusudur ki, öz günahsızlığını sübut etsin”.
Emin Milli digər bloqqer Adnan Hacızadə ilə birgə ötən il iyulun 8-də Bakının «Livan» restoranında baş verən insidentdən sonra tutulub. Hücuma məruz qaldıqlarını və döyüldüklərini deyən gənclərə qarşı qəsdən sağlamlığa az ağır zərər vurma və xuliqanlıq maddələri üzrə ittiham irəli sürülüb. Adnan Hacızadəyə 2 il, Emin Milliyə isə 2 il 6 ay həbs cəzası kəsilib.
AzadlıqRadiosunu Rusiya hökuməti "arzuolunmaz təşkilat" elan edib.
Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.
