►İkili vətəndaşlığı olan amerikalı İranda həbs edilib. Qəzetlər onun ölkədə həbs edilmiş dördüncü İran əsilli amerikalı olduğunu yazır.
Crescent Petroleum Co. şirkətinin Dubayda işləyən əməkdaşı Siamak Namazi İslam İnqilab Keşikçiləri Korpusunun xüsusi xidmət qolu tərəfindən bugünlərdə Tehranda həbs edilib. "Washington Post" və "Wall Street Journal"-ın yazdığına görə o, iki həftəlik Tehrana gedibmiş.
Hələlik Tehrandan Siamak Namazinin həbsi ilə bağlı hər hansı rəsmi reaksiya yoxdur.
Namazinin ailəsi Tehran, Dubay və Vyanada ofisləri Atieh Group consultant şirkətinin sahibidir. "Wall Street Journal" yazır ki, şirkət müştərilərinə İran bazarına girmək barədə məsləhət xidmətləri təklif edirmiş.
Namazinin dostları "Wall Street Journal"a bildiriblər ki, İranın xüsusi xidmət agentləri onun ata evində axtarış aparıblar. Onun kompyuteri müsadirə olunub və məktublaşdığı adamlardan bəziləri kiberhücumlara məruz qalıb.
Bir yüksək rütbəli ABŞ rəsmisi deyib ki, administrasiya məsələni araşdırmaqdadır.
İranda həbs edilmiş digər 3 İran əsilli amerikalıdan biri "Washington Post"un müxbiri Jason Rezaiandır. O, keçən il cəsusluqda ittiham edilərək həbs edilib.
Digər iki nəfərsə keçmiş ABŞ dəniz piyadası, cəsusluq ittihamı ilə həbs edilmiş Amir Hekmati və İncil tədris qrupu təşkil etmiş dönmə xristian Saeed Abedinidir.
