*Youtube Kanalımıza abunə olun - Hər gün yeni video izləyin
«Övladlarım mədəni və sosial məsələlərdə çox fəaldırlar».
President.az saytının xəbərinə görə, bunu dövlət başçısı İlham Əliyev noyabrın 17-də Dünya Xəbər Agentliklərinin V Konqresinin iştirakçıları ilə görüşü zamanı deyib.
Övladlarının gələcəkdə siyasətlə məşğul olub-olmayacaqlarına dair Avropa Xəbər Agentlikləri Alyansının prezidenti Jonas Olof Eriksson-un sualını cavablandıran dövlət başçısı bildirib ki, bu, onların istək və planlarından asılıdır:
«Düşünürəm ki, hələ, onlar öz fəaliyyətindən razıdırlar. Yeri gəlmişkən, onların ikisi həmçinin media ilə də bağlıdır. Böyük qızım uzun illərdir ki, Azərbaycanı Rusiya və beynəlxalq auditoriyaya təqdim edən «Baku» jurnalının baş redaktorudur. Jurnal iki dildə - ingilis və rus dillərində çap olunur. Siz bu jurnalı internetdə görə bilərsiniz».
İ.Əliyev ikinci qızının da jurnalistika ilə bağlı məsələlərlə məşğul olduğunu və jurnalist təhsili aldığını söyləyib. Prezident qızının Azərbaycanın müasir ölkə kimi tanınması istiqamətində sənədli filmlər üzərində çalışdığını və digər tədbirlərdə iştirak etdiyini söyləyib.
İ.Əliyev oğlunun, hələlik, tələbə olduğunu qeyd edib. Onun deməsinə görə, oğlunun gələcək seçimi özünə aiddir: «O, Bakıda universitetdə iqtisadiyyat üzrə təhsil alır. Beləliklə, bu, onların qərarı olacaq. Azərbaycan hər kəs üçün bərabər imkan yaradan ölkədir. Əgər onlar öz gələcəyini siyasətlə bağlamaq istəsələr, bu, onların seçimi olacaq», - deyə o vurğulayıb.