Keçid linkləri

logo-print
2016, 05 Dekabr, Bazar ertəsi, Bakı vaxtı 18:55

►Gödəkqobulular “Qaynar xətt”ə yazır

Yerli vergi orqanından, DSMF-dən giley-güzar edən kim, bələdiyyədən, icra hakimiyyətindən yazan kim…

Zərdabın Gödəkqobu kəndinin sakinləri AzadlıqRadiosuna məktub yollayıblar.

Daha dürüstü, sakinlər ölkə başçısına yolladıqları məktubun bir nüsxəsini radioya ismarıclayıblar. Yerli vergi orqanından, Dövlət Sosial Müdafiə Fondundan (DSMF) giley-güzar edən kim, bələdiyyədən, icra hakimiyyətindən yazan kim…

“AİLƏM ACINDAN ÖLÜR”

Sima Seyidovanın şikayəti 9 saylı ərazi vergilər idarəsinin və Dövlət Sosial Müdafiə Fondunun işçilərindəndir. Deyir, ona sahibkarlıq fəaliyyəti ilə məşğul olmağa imkan vermirlər:

“Kiçik bir dükanım var. Hər ay vaxtlı-vaxtında vergimi, sosial sığortamı ödəyib o kiçik, gəliri xərcindən az olan dükanla birtəhər ailəmi saxlamağa çalışıram. Ancaq hər iki qurumun yerli şöbəsi məni cərimələyib. Vergini, sosial sığortanı vaxtında ödədiyim barədə qəbzlərim də var. Ancaq qulaq asan kimdir? Başım qarışıb vergi işçiləriylə “savaşa”, dükan da yaddan çıxıb, ailəm acından ölür. Bizim başımızı belə qatırlar”.

Kəndin başqa sakini Ramil Zeynalov yerli bələdiyyədən narazıdır. Deyir, bələdiyyə üzvləri kənd təsərrüfatının inkişafına əngəllər yaradırlar:

“KƏNDLİYƏ HESABAT VERƏN YOXDUR”

"İşsiz adamam. Hökumət iş vermir. Mən də ailəmi saxlamaqdan ötrü çox götür-qoy edib “Aqrolizinq”dən bir traktor aldım. Sonra da kənd ərazisində bələdiyyənin mülkiyyətində olan 9 hektar torpaq sahəsinin mənə icarəyə verilməsinə görə bələdiyyəyə dəfələrlə müraciət etdim. Aylarla müraciətimə cavab ala bilmədim, indi də eşidirəm ki, həmin torpağı başqasına verib. Belə çıxır ki, traktoru həyətdə istifadəsiz saxlamağa almışam”.

___________________________________________________________

Bunlara da bax:
Emin Millinin qaynına 3 il şərti cəza verildi
«Murad Ədilov özü cinayətin qurbanıdır»

___________________________________________________________

Ramil Zeynalovun sözlərinə görə, yerli bələdiyyə, hələ bircə dəfə də olsun, kənd sakinlərini yığıb gördüyü işlərin hesabatını verməyib:

“Bələdiyyənin 1000 hektardan çox torpaq sahəsi kəndin sakini olmayan, kənar şəxslərə icarəyə verilir. Kəndliyə çatandasa deyirlər, “boş sahə qalmayıb”. İcarəyə verdikləri torpaqların vergiləri necə ödənilir? Kəndliyə hesabat verən yoxdur. Bələdiyyə sədrinin əmisi kəndin icra nümayəndəsidir. Beləcə, qohum-əqraba kənddə bir-birlərinə arxalanıb kəndlilərin başına oyun açırlar”.

AYLAR, İLLƏRLƏ SÜRÜNDÜRÜRLƏR

Kənd sakini Abdulhəmid Əhədovun dərdi göl dərdidir. Yazır ki, kənddə 17 hektar sahəsi və bolluca balığı olan göl var. Bələdiyyə sədri həmin gölü öz qohumuna icarəyə verib:

“Əslində, sənəd üzərində gölün 8 hektarı həmin şəxsə verilsə də, faktiki, 17 hektarın hamısı onun istifadəsindədir”.

Kənd sakini Ayaz Rüstəmov isə rayonun Əhalinin Sosial Müdafiəsi Mərkəzindən şikayətçidir. Deyir, Mərkəz ünvanlı sosial yardım almaq istəyənləri aylarla, hətta illərlə süründürür:

“Himayəmdə 3 azyaşlı uşağım var. Yoxsulluq içində yaşayıram. Gündəlik qazancım 5 manatdır. Bu qazancla 3 uşağı necə saxlayım, bilmirəm. Aylardır ki, Mərkəzə sənəd verirdim, hər dəfə bir bəhanə ilə özümə qaytarırdı. İndi də deyirlər, “get, onlayn müraciət elə”. Bir yoxlama göndərsinlər, aparım ünvanlarını göstərim, qoy görsünlər, rayonda ünvanlı sosial yardımı kimlər alır”.

“DƏRD BİR DEYİL, İKİ DEYİL”

Kəndlilər kəndiçi yollarından da yazırlar. Bildirirlər ki, torpaq sahələri düzgün ölçülmədən satılıb, evlər tikilib, həyətlər hasara alınıb və küçələrin enindən azı 4 metr kəsilib:

“Hətta əkin sulamaq üçün su kanalının bir neçə hissəsi də satılıb. Suvarma kanalını lildən təmizləmirlər deyə, hövzəsi daralıb. Bu yay əkin sahələrini necə suvaracağımızı bilmirik. Dərd bir deyil, iki deyil, hələ gəlib qəzalı elektrik dirəklərini bir görsəniz…” – yazır sakinlər.

Gödəkqobu bələdiyyəsi ittihamları qəbul etmir. Bələdiyyədən “Qaynar xətt”ə bildirilib ki, bələdiyyənin fondunda olan əkin sahələri müraciət edən kəndlilərə bərabər qaydada icarəyə verilir.

Zərdab rayon icra hakimiyyətindən isə kəndlərin sosial durumu ilə bağlı sosial layihələrin həyata keçirildiyini deyirlər. Deyilənə görə, bu layihələr, əsasən, kəndlilərin təsərrüfatının və xidmət sahələrinin yaxşılaşdırılmasına yönəlib.

Vergilər Nazirliyinin mətbuat xidmətindən isə bildirdilər ki, gödəkqobuluların vergi idarəsi ilə bağlı problemi varsa, rəsmi şəkildə Nazirliyin özünə müraciət edə bilərlər: “Xüsusilə son vaxtlar sahibkarların bu tipli məktubları diqqətlə araşdırılır”.

DSMF-dənsə gödəkqobulu dükan sahibinin narazılığına münasibət öyrənmək mümkün olmayıb.

Siz də şikayətinizi buradan göndərə bilərsiz

ƏLAQƏ ÜÇÜN

nömrəmiz (+420) 778 711 700

Çəkdiklərinizi, eləcə də şikaylətlərinizi bizə WhatsApp-dan başqa,

XS
SM
MD
LG