►Onlar "ədalətsiz ölümə, böhtan və qəsdən vurulan mənəvi ziyana" görə təzminat istəyirlər
Dörd il öncə Benqazidəki hücumda həyatlarını itirmiş iki amerikalının valideynləri ozamankı dövlət katibi Hillary Clinton-u məhkəməyə verib.
Benqazidə ölənlərdən birinin anası - Patricia Smith və digərinin atası - Charles Woods ədalətsiz ölümə, böhtan və qəsdən vrurulan mənəvi ziyana görə təzminat istəyirlər.
Clinton-un cavabları narazılıq doğurub
Smith və Woods ovaxtkı dövlət katibi Hillary Clinton-dan oğulları ölən gecə Benqazidəki ABŞ diplomatik heyətində nə baş verdiyini soruşublar. Di gəl, xanım Clinton-un istər özəl, istərsə ictimai cavabları onları razı salmayıb.
Məhkəmə iddiasını "Judicial Watch" ("Məhkəmə Nəzarəti") mühafizəkar təşkilatının təmsilçisi Larry Klayman tərtib edib. Bu qurum Clinton-a tənqidi mövqe tutur.
Clinton-un seçki kampaniyasının sözçüsü Nick Merrill-in sözlərinə görə, keçmiş dövlət katibinin Benqazi insidenti ilə bağlı fəaliyyəti dəfələrlə araşdırılıb, ancaq hətta Konqresin Nümayəndələr Palatasının xüsusi komissiyası da heç bir pozunti aşkar etməyib: (ardı aşağıda)
Liviyada ABŞ səfirini qətlə yetiriblər
“Ancaq bu hücumla bağlı...”
"Heç kim Benqazidə itirdiyimiz cəsur amerikalıların ailələrinin ağrısını təsəvvür edə bilməz. Ancaq bu hücumla bağlı 9 müxtəli araşdırma aparılıb və onlardan heç biri Hillary Clinton-un hər hansı pozuntusunu tapmayıb". Nick Merrilll CNN-ə açıqlamasında bu sözləri dilə gətirib.
Benqazidə ölən Sean Smith-in anası Patricia Smith Respublikaçılar Partiyasının Klivlenddə keçirilən milli qurultayındakı çıxışında Clinton-u sərt tənqid edib:
"Benqazi faciəsinin Amerikaya gətirdiyi bütün bu itkiyə, bütün bu kədər və bütün bu riyakarlığa görə, mən Hillary Clinton-u günahkar bilirəm. Oğlumun ölümündən şəxsən Hillary Clinton təqsirkardır".
ABŞ Hərbi Dəniz Qüvvələrinin xüsusi təyinatlısı Tyrone Woods-un atası Charles Woods da Clinton-u CNN-in efirindən tənqidə tutub:
"Clinton Benqazidə sübut etdi ki, heç özünün 35 işçisini də qorumağa qadir deyil. Bəs o, ölkədəki 330 milyon amerikalını necə müdafiə edə bilər?".
Clinton-un tənqidlərə cavabı
Sözügedən ailələrin ittihamlarını “Fox” telekanalında Clinton belə cavablandırıb:
"Onların hər ikisinə ürəyim yanır. Necə olursa-olsun, övlad itirmək çox ağırdır. Xüsusən bu halda. Dövlət Departamentinin iki əməkdaşı, SİA-in (ABŞ Mərkəzi Kəşfiyyat İdarəsinin – red) bağlaşmalı işçisi olan iki qeyri-adi insan ölkə və dəyərlərimizi qoruyaraq həyatlarını itirib. Mən bunun arxasında duran dərdi və yeridolmaz itki hissini anlayıram".
