-
Alıcı bir cür narazı, satıcı başqa cür
Kənd Təsərrüfatı məhsulları yarmarkasından reportaj
– Qiymətlər yaxşıdı, pis deyil, qane edir.
– Bahadı, hamının cibinə uyğun deyil axı..
“ELƏ BAZAR QİYMƏTLƏRİDİR”
Xətai rayonunda, “Bakı” kinoteatrının yaxınlığındakı yarmarkadayıq. Bazarlarda qiymətlərin “od-tutub yandığını” düşünənlər adətən, bu yarmarkalara üz tutur. Bir müddətiydi, daha doğrusu, Avropa Oyunlarına görə ləğv olunmuş yarmarkalar yenidən bərpa olunub.
Alıcılardan bəziləri qiymətlərin sərfəli olduğunu deyir. Ancaq bahalıqdan şikayət edənlər də var. Onların sözlərincə, qiymətlər kiməsə sərfəli ola bilər, ancaq:
– Bir ailənin qazancı yaxşıdısa, onlara qiymətlər o qədər də baha görünməz, amma kasıb-kusuba yenə ucuz deyil...
Alıcılardan Güldəstə xanım deyir ki, bahaçılıqdı:
– Elə burda da bazar qiymətinədir. Həftəsonunu gözləyirik ki, yarmarka olsun. O da belə, qiymətlər kəllə-çarxa çıxır. Yəqin ki, çoxu bazarlarda işləyən satıcılardır. Ona görə də qiymətlərdə heç bir fərq nəzərə çarpmır. Yoxsa hər halda, fermer öz məhsulunu rayonlardan gətirsə, məhsullar nisbətən ucuz olar.
ZİBİL QUTULARI YOXDUR
Digər bir alıcı Ceyran Zeynalova yarmarkadakı natəmizlikdən şikayətlənir. Deyir ki, satılan məhsulların xarab olanları yerə tökülür. Kənarlarda zibil qutuları quraşdırılsa, bir neçə saatdan bir zibillərin daşınmasına nəzarət edilsə, yaxşı olar.
Məhsulların keyfiyyətindən narazılar da var. Cavid Məmmədov yaxşı kartof tapa bilmədiyini sözləyir:
– Kilosunu hərə bir qiymətə deyir. Amma baxırsan ki, elə keyfiyyətcə hamısı eynidir.
BAXIR ALMAYA...
Qiymət fərqini Qubadan olan fermer Arif Həsənovun öz izahı var, deyir, kilosu 50 qəpiyə də alma var, 3 kilosu 1 manata da, baxır almaya:
– Bu alma neçəyədi?
– Kilosu 50 qəpik.
– Yəni, təmiz məhsuldur?
– Bəli. Bunların 3 kilosu 2 manatdır. Sadəcə, bu il meyvəmiz azdı. Çox azdı, həqiqətən çox azdı.
– Yox, qiyməti sərfəlidir, ucuz satırsan, Mehriban xala zənbilini doldurur.
Arif Həsənov yarmarkada heç bir problemlə qarşılaşmadığını deyir. Belə ki, başı çox çəkib, şəhərdəki bazarlarda onlara yer ayıran yoxdur deyə, məhsulunu bura gətirir:
– Bazarlarda rayonlardan gələn maşınlara elə yer verirlər ki, orada bir həftəyə heç 1 yeşik alma satmaq olmaz. Bizə bura rahatdır. Gətirdiyimiz məhsulların keyfiyyətinə söz ola bilməz.
Salyan rayonundan fermer Əsəd İsrafilov da Bakıdakı bazarlara girmək imkanları olmadığını deyir:
– Bura yaxşıdır. Məhsulumuzu rahat satırıq.
“HAMISI ALVERÇİLƏRDİR”
Ancaq digər satıcılardan daha çox giley-güzar eşitdik. Bəziləri yarmarkada yer tapmamaqdan – kəndlərdən gələn fermerlərə yetərli sayda yer ayrılmamasından, bəziləri isə ancaq ödəniş etdikdən sonra maşınlarını yarmarkaya daxil edə bilmələrindən narazıdılar.
Deyirlər, I Avropa Oyunları zamanı yarmarkalar dayandırıldıqdan sonra onlar lazımi orqanlara müraciət ediblər ki, bu satış mərkəzləri yenidən təşkil edilsin:
"Çox sağ olsunlar, nəzərə aldılar və yarmarkalar yenidən fəaliyyətə başladı. Amma burda bizə yer vermirlər. Hamısı şəhərdəki alverçilərdir”.
YER AZDI, OĞURLUQ HALLARI VAR
Qubalı fermer Əlövsət Əsədovun qanı isə bir az qaradır. Deyir, 2 yeşik məhsulunu oğurlayıblar. Ətrafındakı fermer yoldaşları söhbətə qoşulur. Deyirlər ki, onlar bir gün öncədən gəlirlər, məhsulları yerbəyer edirlər, piştaxtaları qururlar:
– Gecə də yarmarkaya nəzarətçilər göz qoyur. Lakin onlardan soruşursan ki, “məhsullar hardadır?” Deyirlər “biz bilmirik”. Bu hadisə artıq bir neçə dəfədir ki, təkrarlanır. Keçən həftə də oğurluq olmuşdu.
Fermerlərin məhsulların oğurlanması, onlara istədikləri yerin ayrılmaması, yarmarkaya maşınla girmək üçün ödəniş etmələri barədə iradlarına isə yarmarka nəzarətçilərindən münasibət ala bilmədik.
Bu həftə şəhərin ayrı-ayrı yerlərində yarmarkalara 400 tondan artıq kənd təsərrüfatı məhsulunun çıxarıldığı bildirilir. Bu yarmarkalarda Kürdəmir, Salyan, Biləsuvar, Qax, Şəmkir, Qəbələ, Quba, Astara, Daşkəsən fermerləri iştirak edir.
