Keçid linkləri

2016, 08 Dekabr, Cümə axşamı, Bakı vaxtı 16:00

►Hamının adamı var, heç kimin insanı yoxdu...

Amil Məmibəyli

***

Yağış yağandan sonra cücərib çıxan otlar

torpağın tüklərinin biz-biz durmasıdı idi,

amma sən bunu görmürdün.

Səssizliyin himni səsləndikcə

günəş ayağa qalxırdı,

amma sən bunu hiss etmirdin.

Göydən düşən meteoritlər

Allahın bizi şeytan sanıb

bizə atdığı böyük daşlar idi,

bizsə onların ətrafına yığışıb bütləşdirdik.

Ömürlük həbs olunan gənc məhbus

hardan biləydi ki

bu dörd divar arxasında o,

yüz ildən çox ömür sürəcək

və bir gün ölüm əfv eləyəcək onu ancaq.

Ən böyük arzularım ən kiçik arzularımdı, doktor,

amma dünyanın ən varlı adamının

mırta aldığı lotereyada

cekpotu udması kimi bir şeydi ilahi ədalət.

"Tarix yazmaq üçün

tarixi yaxşımı bilmək lazımdı?" deyə

müəllimdən soruşan şagird

bilmirdi ki,

cəsarət heç vaxt tədris olunmur.

Eh doktor, nə bilirsən axı sən? Nə bilirsən?

Onu bil ki əsas,

pilləkanı olan adamlar bir yerə,

nərdivanı olanlarsa hər yerə qalxa bilər,

amma onu da bil ki,

qalxmaq üçün nərdivana arxa lazımdı, dayaq.

Bir sözlə, doktor...

Zaman heç vaxt anlamayacaq ki

qaçmağın bir faydası yoxdu,

onsuz da o heç vaxt çatmayacaq

çatmalı olduğu yerə və inan mənə, doktor,

bir gün hər şey tərsinə çönəcək

və bir gün sizə də deyəcəklər,

"dərindən nəfəs al, nəfəsini saxla".

***

Azadlığın radiosu, meydanı,

qəzeti, prospekti, metrosu, hətta qadın heykəli də oldu,

amma özü olmadı.

***

Nə qəribə fizioloji yaradılışı var insanın.

Birisi qollarının qatlanacağı yerdən

gücünü göstərərkən

birisi ayaqlarının qatlanacağı yerdən

diz çökür, ilahi.

***

Hamının adamı var,

heç kimin insanı yoxdu.

Bəlkə də başqasının həyatını həyata keçirməkdi həyat.

***

Ağ kəfənli meyitlər

ağa bələnmiş heykəl tək Allahın o dünyada açılışın etdiyi heykəlmiş. Meyitlərsə çürüyüb

uçurdulan heykəl tək zamanın Allaha qarşı törətdiyi inqilab,

təxribatmış sən demə.

***

Elə insanlar var ki

ürəklərinin dediyini

nəyinki dilləri səhv dublyaj edir

hətta sinxron olaraq

dodaqlarıyla belə üst-üstə düşmür.

***

Deyirlər yumruq boyda olur ürəklər. İçdən döyüb adamı, vurur,vurur öldürənə kimi.

***

Bu zəng çölə vuruldu, içəri deyil təəssüf. Şagirdlər yox həkimlər qışqırdılar,tənəffüs.

***

Yağ ey, ağ qar, çoxlu yağ. Topsuz uşaqların

qartopusu kimi, adamı olmayanların

qaradamı kimi yağ.

***

Bir gün qalib edib bir əlini, o biri günsə təslim edib hər iki əlini qaldırarlar.

***

Bir gün ən faydalı qazıntılarla

bəzədiyin bədəninin hissələrini

ən faydasız qazıntı kimi tapacaqlar.

Günün bütün mövzuları

XS
SM
MD
LG