Son iki ildə 50-də artıq hakim haqqında iltizam icraatı aparılıb. Ötən il isə 30 hakim vəzifəsindən azad edilib. Bu barədə Milli Məclisin iclasında Dövlət quruculuğu və hüquq siyasəti komissiyasının sədri Əli Hüseynov məlumat verib.
O, ötən il korrupsiyaya görə 3 hakimin səlahiyyətlərinə vaxtından əvvəl xitam verildiyini, 3 hakimin isə aşağı vəzifəyə keçirildiyini deyib.
Parlament iyunun 13-də keçirilən iclasında Ali Məhkəmə, Naxçıvan Muxtar Respublikası Ali Məhkəməsinə, həmçinin Bakı, Sumqayıt, Gəncə, Şirvan şəhərlərinin apelliyasiya məhkəmələrinə hakimlərin təyin edilməsi məsələsini müzakirəyə çıxarıb.
Sumqayıt şəhər məhkəməsinin hakimi Gülnarə Tağızadənin həmin şəhərin apelliyasiya məhkəməsinə hakimliyinə namizədliyinin irəli sürülməsi bir sıra deputatların narazılığına səbəb olub. Deputatlar İqbal Ağazadə və Pənah Hüseyn bu hakimin Sərdar Cəlaloğlunun işi ilə çıxardığı hökmün Avropa İnsan Haqları Məhkəməsi tərəfindən ləğv edildiyini bildiriblər. Onlar hesab edir ki, bu hakimin daha yuxarı instansiyaya irəli çəkilməsi düzgün deyil.
Müzakirələrdən sonra deputatlar səs çoxluğu ilə bütün hakimlərin namizədliyini təsdiq ediblər.
