İyunun 11-də yüzlərlə şagird və valideyn Təhsil Nazirliyinin qarşısına şikayətə toplaşıblar. Onlar bir neçə gün əvvəl orta məktəblərdə keçirilmiş mərkəzləşdirilmiş test imtahanının nəticələriylə razılaşmadıqlarını bildiriblər.
«Azadlıq» radiosu ilə söhbətlərində şagirdlər əsasən coğrafiya, kimya və bilogiya fənnlərindən kəsildiklərini deyiblər. Onlar sınaq imtahanından aldıqları qiymətin nəticələrdə nəzərə alınmamasından şikayətləniblər.
Təhsil Nazirliyindən şikayətçilərə deyiblər ki, testin nəticələrindən narazı qalanlar iyunun 17-nə kimi Apellyasiya Komissiyasına ərizə ilə müraciət edə bilərlər.
İyunun 6-da orta məktəblərin 11-ci sinif şagirdləri sonuncu mərkəzləşdirilmiş test imtahanı veriblər. Testdə ölkə üzrə 43 faiz şagird iştirak edib. İyunun 10-u axşam testin nəticələri açıqlanıb. Nəticələrə görə, 52.000 şagirddən 2.000-i 2-i alıb.
Mərkəzləşdirilmiş testdən qabaq şagirdlər bir neçə dəfə sınaq imtahanları verirlər.
Gələn il testin bütün orta məktəblərdə keçirilməsi planlaşdırılır.
Mərkəzləşdirilmiş test imtahanı Azərbaycanda ötən ildən tətbiq olunur.
