Bakı 2016-cı il Olimpiadasının keçirilməsinə namizəd şəhərlərin yekun siyahısına düşmədi. Bu barədə qərar iyunun 4-də Beynəlxalq Olimpiya Komitəsinin Afinada keçirilən iclasında qəbul olunub.
Komitənin prezidenti Jak Roqqenin elan etdiyi yekun siyahıya yeddi namizəd şəhərdən dördü düşüb. Bunlar Çikaqo, Madrid, Rio-de Janeyro və Tokiodur. Bakı, Doha və Praqa siyahıdan kənarda qalıb. 2016-cı il Olimpiadasının hansı şəhərdə keçiriləcəyi 2009-cu il oktyabrın 2-də Kopenhagendə bəlli olacaq.
Keçən il Beynəlxalq Olimpiya Komitəsi Azərbaycanın ərizəsini qəbul edərək paytaxt Bakını 2016-cı il Olimpiadasının keçirilməsinə rəsmi namizəd şəhərlər siyahısına daxil etmişdi.