Ermənistanda əsir saxlanan Azərbaycan əsgəri qaytarılıb. Beynəlxalq Qırmızı Xaç Komitəsindən (BQXK) «Azadlıq» radiosuna verilən məlumata görə, əsgər Yaqub Muxtarovu aprelin 23-ü günorta saatlarında təhvil verilib.
Əməliyyat Ermənistanın İcevan şəhəriylə Qazax arasındakı yolda, BQXK-nın vasitəçiliyilə keçirilib. Əməliyyatdan əvvəl komitənin işçiləri bir neçə dəfə əsgərə baş çəkiblər.
Komitədən verilən məlumata görə, əsgər Azərbaycana öz xoşuyla qaytarılır. Erməni tərəfi deyirdi ki, Yaqub Muxtarov Ermənistana könüllü keçib, çünki onu orduda incidiblər. Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası isə bildirmişdi ki, Muxtarov Ermənistan hərbçiləri tərəfindən əsir götürülüb.
Şəki rayonundan hərbi xidmətə çağırılmış Yaqub Muxtarov bu il martın 10-da Tovuzda əsir düşmüşdü.
